കൊച്ചിയിൽ 25 കോടി രൂപ സൈബർ തട്ടിപ്പ്: മലയാളികളുടെ പങ്ക് സംശയിക്കുന്നു

കൊച്ചി ∙ കൊച്ചി സ്വദേശിയിൽ നിന്ന് 25 കോടി രൂപ തട്ടിയെടുത്ത സൈബർ തട്ടിപ്പ് കേസിൽ മുഖ്യ ആസൂത്രകർ മലയാളികളാണെന്ന സംശയം ശക്തമാകുന്നു. പണത്തിൽ ഒരു പങ്ക് ഏറ്റുവാങ്ങിയ മലയാളി യുവതിയെ പോലീസ് അറസ്റ്റ് ചെയ്തിട്ടുണ്ട്. കേസിൽ കൂടുതൽ മലയാളികൾ ഉൾപ്പെട്ടിട്ടുണ്ടെന്ന വിവരം അന്വേഷണത്തിൽ പുറത്തുവന്നു.

2023 മാർച്ച് മുതൽ 2025 വരെയുള്ള കാലയളവിലാണ് കൊച്ചി സ്വദേശിയെ വഞ്ചിച്ച് 25 കോടി രൂപ കൈവശപ്പെടുത്തിയത്. ഉയർന്ന ലാഭം വാഗ്ദാനം ചെയ്ത് വ്യാജ ട്രേഡിങ് വെബ്‌സൈറ്റുകളിലേക്കാണ് ഇയാളെ പ്രലോഭിപ്പിച്ചത്. ബാങ്ക് അക്കൗണ്ടുകൾ വിലയ്ക്കുവാങ്ങി ഉപയോഗിച്ചാണ് ഇടപാടുകൾ നടത്തിയതെന്നാണ് കണ്ടെത്തൽ. വാങ്ങിയ അക്കൗണ്ടുകൾ തട്ടിപ്പ് സംഘത്തിന്റെ നിയന്ത്രണത്തിലായിരുന്നെങ്കിലും, കേസുകളിൽ ആദ്യം പിടിയിലാകുന്നത് അക്കൗണ്ട് ഉടമകളായിരിക്കും.

തട്ടിപ്പിന്റെ ആസൂത്രണം കാലിഫോർണിയയിലാണ് നടന്നതെന്നും, ഇടപാടുകാരെ സമീപിച്ച കോൾസെന്റർ സൈപ്രസിലാണെന്നും അന്വേഷണത്തിൽ വ്യക്തമായി. രാജ്യാന്തര തലത്തിൽ നേരത്തേയും നിരവധി സൈബർ തട്ടിപ്പുകളിൽ പ്രതിസ്ഥാനത്ത് വന്നിരുന്ന കമ്പനിക്കെതിരേ ഇന്ത്യയിലെ മറ്റ് സംസ്ഥാനങ്ങളിലും പരാതികൾ ലഭിച്ചിട്ടുണ്ട്.

‘ഡാനിയേൽ’ എന്ന് പരിചയപ്പെടുത്തിയ, മലയാളം സംസാരിക്കുന്ന ഒരാളുമായി ഇര ആശയവിനിമയം നടത്തിയതായി കണ്ടെത്തിയിട്ടുണ്ട്. ഈ പേര് വ്യാജമാണെന്നാണ് അന്വേഷണ സംഘത്തിന്റെ നിഗമനം. കമ്പനി യഥാർത്ഥമാണോ, ഓൺലൈൻ ട്രേഡിങ് നടത്തുന്നതാണോ, ഇന്ത്യയിൽ രജിസ്‌ട്രേഷൻ ഉണ്ടോ തുടങ്ങിയ കാര്യങ്ങൾ പരിശോധിച്ച് വരികയാണ്.