പൈകയിൽ പൊതു ശുചിത്വ സമുച്ചയം പൂട്ടിയ നിലയിൽ; വ്യാപാരികളും യാത്രക്കാരും ദുരിതത്തിൽ

പൈക ∙ ടൗണിന്റെ  മധ്യഭാഗത്തുള്ള പൊതുശുചിത്വ സമുച്ചയം ഏറെ നാളുകളായി പൂട്ടിയ നിലയിൽ തുടരുന്നതിനെ തുടർന്ന് വ്യാപാരികളും യാത്രക്കാരും വലിയ ദുരിതം അനുഭവിക്കുകയാണ്. ദിവസേന പട്ടണത്തിലൂടെ കടന്നുപോകുന്ന യാത്രക്കാരുടെയും വ്യാപാരത്തിനായി എത്തുന്നവരുടെയും പ്രധാന ആശ്രയ കേന്ദ്രമായിരുന്നു ഈ ശുചിമുറി.

സമുച്ചയം പ്രവർത്തനരഹിതമായതോടെ യാത്രക്കാരും നാട്ടുകാരും സമീപത്തെ സ്വകാര്യ ശുചിമുറികൾ ആശ്രയിക്കേണ്ടി വരുന്ന സാഹചര്യമാണിപ്പോൾ. പലപ്പോഴും അടിയന്തരാവശ്യങ്ങൾക്കായി ആളുകൾ വഴിയോരങ്ങളിൽ തന്നെ അനാരോഗ്യകരമായ രീതിയിൽ പ്രാഥമിക കൃത്യങ്ങൾ നിർവഹിക്കേണ്ടി വരുന്നുണ്ടെന്നും വ്യാപാരികൾ പറയുന്നു.

പൊതു സമുച്ചയം വർഷങ്ങൾ മുമ്പ് പുതുക്കിപ്പണിതെങ്കിലും ആവശ്യമായ പരിപാലനമില്ലാതെ അടച്ചിടുകയായിരുന്നു. ശുചിത്വത്തിന്റെ അഭാവം മൂലം രോഗങ്ങളുടെ സാധ്യത കൂടുന്നുവെന്നും, ഉടൻ നടപടി സ്വീകരിക്കണമെന്ന് വ്യാപാരികളും നാട്ടുകാരും ബന്ധപ്പെട്ട വകുപ്പുകളോട് ആവശ്യപ്പെട്ടു.

പട്ടണത്തിന്റെ ഗൗരവമേറിയ പ്രശ്നമായി മാറിയിരിക്കുന്ന വിഷയത്തിൽ പഞ്ചായത്ത് അധികൃതർ അടിയന്തിരമായി ഇടപെടണമെന്ന് നാട്ടുകാർ ആവശ്യപ്പെടുന്നു.

പഞ്ചായത്ത് ഭരണ സമിതിയുടെ പിടിപ്പുകേട് കൊണ്ടാണ് ഇത്തരമൊരു അവസ്ഥയിലേക്ക് കാര്യമെത്തിയതെന്ന് വ്യാപാരികളും നാട്ടുകാരും ആരോപിക്കുന്നു. നിർമ്മാണത്തിനും പരിപാലനത്തിനുമുള്ള ചെലവിൽ അഴിമതി നടന്നതായും, ഉദ്ദേശ്യപ്രാപ്തിയില്ലാതെ പൊതു പണം ചിലവാക്കിയെന്നുമുള്ള ആരോപണങ്ങളും ഉയരുന്നുണ്ട്.