യൂത്ത് കോൺഗ്രസ് സംസ്ഥാന പ്രസിഡന്റായി ഒ.ജെ. ജനീഷ്

ന്യൂഡൽഹി: ഒ.ജെ. ജനീഷിനെ യൂത്ത് കോൺഗ്രസ് സംസ്ഥാന പ്രസിഡന്റായി നിയമിച്ചു. ബിനു ചുള്ളിയിലാണ് പുതിയ വർക്കിംഗ് പ്രസിഡന്റ്. ദേശീയ പ്രസിഡന്റ് ഉദയ് ബാനു ചിബ് പ്രഖ്യാപിച്ച പുതിയ ഭാരവാഹികളിൽ കെ.എം. അഭിജിത്തും അബിൻ വർക്കിയും ദേശീയ സെക്രട്ടറിമാരായി ഉൾപ്പെടുന്നു.

മുൻ സംസ്ഥാന വൈസ് പ്രസിഡന്റായിരുന്ന ഒ.ജെ. ജനീഷാണ് നിലവിൽ സംസ്ഥാന അധ്യക്ഷസ്ഥാനത്തേക്ക് ഉയർന്നത്. ലൈംഗികാരോപണം ഉയർന്നതിനെ തുടർന്ന് രാഹുൽ മാങ്കൂട്ടം രാജിവെച്ചതോടെ അധ്യക്ഷ സ്ഥാനം ഒഴിഞ്ഞുകിടക്കുകയായിരുന്നു.

പുതിയ അധ്യക്ഷസ്ഥാനത്തേക്ക് ഒ.ജെ. ജനീഷിനൊപ്പം അബിൻ വർക്കി, ബിനു ചുള്ളിയിൽ, കെ.എം. അഭിജിത്ത് എന്നിവരെയും പരിഗണിച്ചിരുന്നു. ബിനു ചുള്ളിയിലിന് വേണ്ടി കെ.സി. വേണുഗോപാലും, അബിൻ വർക്കിക്ക് വേണ്ടി രമേശ് ചെന്നിത്തലയും, കെ.എം. അഭിജിത്തിന് വേണ്ടി എം.കെ. രാഘവൻ ഉൾപ്പെടെയുള്ളവർ സജീവമായി രംഗത്തുണ്ടായിരുന്നു.

കഴിഞ്ഞ സംഘടനാ തിരഞ്ഞെടുപ്പിൽ പ്രസിഡന്റ് സ്ഥാനത്തേക്ക് മത്സരിച്ചതും സാമുദായിക പരിഗണനയും ഒ.ജെ. ജനീഷിന് അനുകൂലമായി.