144 പൊലീസുകാരെ പിരിച്ചുവിട്ടെന്ന കണക്ക് തെറ്റാണ്: ചെന്നിത്തല

തിരുവനന്തപുരം: നിയമസഭയിൽ പൊലീസിനെ കുറിച്ചുള്ള വിഷയത്തിൽ പ്രതിപക്ഷം പിന്നോക്കം പോയിട്ടില്ലെന്ന് പ്രതിപക്ഷ നേതാവ് രമേശ് ചെന്നിത്തല വ്യക്തമാക്കി. 144 പൊലീസുകാരെ പിരിച്ചുവിട്ടെന്ന മുഖ്യമന്ത്രിയുടെ കണക്ക് വാസ്തവ വിരുദ്ധമാണെന്നും നാഷണൽ ക്രൈം റെക്കോർഡ്സ് ബ്യൂറോയുടെ കണക്ക് അത് തെളിയിക്കുന്നുവെന്നും അദ്ദേഹം പറഞ്ഞു.

പൊലീസ് സ്റ്റേഷനിൽ പോകുന്നവർ മൂക്കിൽ പഞ്ഞിവെച്ച് തിരിച്ചുവരേണ്ട അവസ്ഥയാണ് കേരളത്തിലെന്നും മുഖ്യമന്ത്രി നിയമസഭയെ തെറ്റിദ്ധരിപ്പിച്ചുവെന്നും ചെന്നിത്തല ആരോപിച്ചു. വിഷയത്തിൽ പ്രതിപക്ഷം നല്ല രീതിയിൽ കോർഡിനേറ്റ് ചെയ്താണ് മുന്നോട്ട് പോകുന്നതെന്നും അദ്ദേഹം കൂട്ടിച്ചേർത്തു.

ഈ സർക്കാർ മാറണമെന്ന സാധാരണ ജനങ്ങളുടെ വികാരം നിയമസഭയിൽ പ്രകടിപ്പിക്കാനാണ് പ്രതിപക്ഷം ശ്രമിച്ചതെന്ന് ചെന്നിത്തല പറഞ്ഞു. എ കെ ആന്റണിക്ക് നീരസം ഉണ്ടായിട്ടില്ലെന്നും, മുത്തങ്ങ വിഷയത്തിൽ കൂടുതൽ കാര്യങ്ങൾ അറിയുന്നതിനാലാണ് അദ്ദേഹം പ്രതികരിച്ചതെന്നും ചെന്നിത്തല വ്യക്തമാക്കി.