ശബരിമല സ്വർണക്കൊള്ള: ഗൂഢാലോചന പുറത്ത് വരണമെന്ന് ഹൈക്കോടതി — ദേവസ്വം ബോർഡിന് എതിരെ കടുത്ത വിമർശനം

കൊച്ചി: ശബരിമല സ്വർണക്കൊള്ള കേസിൽ നടന്ന ഗൂഢാലോചന മുഴുവൻ പുറത്ത് വരണമെന്നും അന്വേഷണത്തിൽ വീഴ്ച പാടില്ലെന്നും ഹൈക്കോടതി നിർദേശിച്ചു. ഇതുവരെയുള്ള അന്വേഷണ പുരോഗതി റിപ്പോർട്ട് പ്രത്യേക അന്വേഷണസംഘം (SIT) കോടതിയിൽ സമർപ്പിച്ചു.

ദേവസ്വം ബോർഡ് ഉദ്യോഗസ്ഥർക്ക് എതിരേ ശക്തമായ വിമർശനമാണ് കോടതി ഉന്നയിച്ചത്. സ്പോൺസറായ ഉണ്ണികൃഷ്ണൻ പോറ്റി സ്വർണം തട്ടിയെടുത്തിട്ടും, അതിനെ തിരികെ നേടാൻ ദേവസ്വം ബോർഡ് യാതൊരു ശ്രമവും നടത്തിയില്ലെന്ന് കോടതി നിരീക്ഷിച്ചു.

കട്ടിളയിൽ നിന്ന് 409 ഗ്രാം സ്വർണം ഉരുക്കിയെടുക്കാൻ ദേവസ്വം ബോർഡ് തന്നെയാണ് അനുമതി നൽകിയതെന്നും, കൊണ്ടുപോയ ദ്വാരപാലക ശിൽപം തന്നെയാണോ തിരികെ കൊണ്ടുവന്നതെന്ന കാര്യത്തിലും സംശയമുണ്ടെന്നും കോടതി വ്യക്തമാക്കി.

കേസിലെ ക്രിമിനൽ ഗൂഢാലോചന അന്വേഷിക്കാനും, സമഗ്രമായ അന്വേഷണം ഉറപ്പാക്കാനുമായി ഹൈക്കോടതി പ്രത്യേക അന്വേഷണസംഘത്തിന് നിർദേശം നൽകി. ദേവസ്വം ബോർഡിന്റെ മിനിറ്റുകളും രേഖകളും പിടിച്ചെടുക്കാനും ഇടക്കാല ഉത്തരവിൽ കോടതി നിർദേശിച്ചിട്ടുണ്ട്.

അന്വേഷണം കട്ടിളയിലോ ദ്വാരപാലക ശിൽപത്തിലോ ഒതുങ്ങരുതെന്നും, എല്ലാവരുടെയും പങ്ക് പരിശോധിക്കണമെന്നും ഹൈക്കോടതി വ്യക്തമാക്കി. “ശബരിമലയിൽ നടന്നത് സംഘടിത കൊള്ളയാണ്,” എന്നാണ് ഇടക്കാല ഉത്തരവിലെ നിരീക്ഷണം.

അടച്ചിട്ട മുറിയിലായിരുന്നു രഹസ്യസ്വഭാവത്തിലുള്ള കോടതി നടപടികൾ. അന്വേഷണത്തിന് ആറ് ആഴ്ചയ്ക്കുള്ളിൽ പൂർത്തിയാക്കാൻ കോടതിയുടെ നിർദേശം. രണ്ടാഴ്ച കൂടുമ്പോൾ പുരോഗതി റിപ്പോർട്ട് സമർപ്പിക്കണം എന്നും ഹൈക്കോടതി ഉത്തരവിട്ടു.

അന്വേഷണ ഉദ്യോഗസ്ഥരുമായി കോടതി നേരിട്ട് ആശയവിനിമയം നടത്തി. കേസ് വീണ്ടും നവംബർ 15ന് പരിഗണിക്കും.

ശബരിമലയിലെ ദ്വാരപാലക ശിൽപങ്ങളും സ്വർണപ്പാളിയും കടത്തിയതിനെച്ചൊല്ലിയാണ് അന്വേഷണം നടക്കുന്നത്. ഉണ്ണികൃഷ്ണൻ പോറ്റിയെ അറസ്റ്റ് ചെയ്തിട്ടുണ്ട്. ദേവസ്വം ബോർഡിലെ ഉന്നതർക്കും ഉദ്യോഗസ്ഥർക്കും സ്വർണക്കൊള്ളയിൽ പങ്കുണ്ടെന്ന് അദ്ദേഹത്തിന്റെ മൊഴിയിലൂടെ വ്യക്തമാകുന്നതായി വിവരം ലഭിച്ചിട്ടുണ്ട്

.