യുഡിഎഫ്–എൽഡിഎഫ് നേതാക്കളെ ലക്ഷ്യമിട്ട് പാലായിൽ ബിജെപി ‘ഓപ്പറേഷൻ’

പാലാ ∙ പാലാ നഗരസഭയിലെ 26 വാർഡുകളിലും സ്ഥാനാർത്ഥികളെ ഇറക്കാനുള്ള തയ്യാറെടുപ്പിലാണ് ബിജെപി. ഇതിനായി വിവിധ പാർട്ടികളിലെ പ്രമുഖരെ സമീപിക്കുന്നതായാണ് റിപ്പോർട്ടുകൾ. പ്രത്യേകിച്ച് കേരളാ കോൺഗ്രസിലെ ഒരു മുൻനിര നേതാവ് ബിജെപിയിൽ ചേരാൻ ഒരുങ്ങുന്നതായാണ് രാഷ്ട്രീയവൃത്തങ്ങളിൽ നിന്ന് ലഭിക്കുന്ന സൂചന. കഴിഞ്ഞ കുറച്ചു കാലമായി രാഷ്ട്രീയ പ്രവർത്തനങ്ങളിൽ നിന്ന് അൽപം അകന്നു നിന്നിരുന്ന ഇയാളുടെ സജീവ ഇടപെടലിലൂടെയാണ് പാലാ സ്റ്റേഡിയം പുനർനിർമ്മിതമായത്. കൂടാതെ 20 രൂപയ്ക്ക് ജനതാ ഊൺ ലഭ്യമാക്കുന്ന പദ്ധതി കിഴതടിയൂർ ബാങ്ക് മുന്നിൽ ആരംഭിക്കുന്നതിലും അദ്ദേഹം നിർണായക പങ്ക് വഹിച്ചു.

യുഡിഎഫിലെയും എൽഡിഎഫിലെയും ചില നേതാക്കളും ബിജെപിയുടെ ‘റഡാറിൽ’ എത്തിയിട്ടുണ്ട്. “സീറ്റും തിരഞ്ഞെടുപ്പ് ചെലവിനാവശ്യമായ സഹായവും പാർട്ടി നൽകും” എന്ന വാഗ്ദാനത്തോടെ തന്നെ ചിലർക്കൊപ്പം ചര്‍ച്ചകൾ മുന്നേറുന്നുവെന്നാണ് വിവരം. ഇതിനകം ചിലർ ‘അര സമ്മതം’ നൽകിയതായും അറിയുന്നു.

ഈ നീക്കങ്ങൾക്ക് നേതൃത്വം കൊടുക്കുന്നത് കോട്ടയം ജില്ലയിലെ ഒരു മുൻ എം.എൽ.എയുടെ പുത്രനാണ്. “ബിജെപിയിൽ ചേർന്നാൽ ആരും ഒറ്റപ്പെടുകയില്ല, പാർട്ടി മുഴുവൻ പിന്തുണയ്ക്കും” എന്നതാണ് നേതൃത്വം നൽകുന്ന ഉറപ്പ്.

അടുത്ത ദിവസങ്ങളിൽ തന്നെ കൂടുതൽ പേർ ബിജെപിയിൽ ചേർന്നേക്കുമെന്നതാണ് രാഷ്ട്രീയ മേഖലയിൽ നിന്നുള്ള സൂചന. നഗരസഭാ തിരഞ്ഞെടുപ്പിനെ മുന്നിൽ കണ്ടുള്ള ബിജെപിയുടെ ‘ഓപ്പറേഷൻ പാലാ’ ശക്തമായ രാഷ്ട്രീയ ചർച്ചകൾക്ക് വഴിയൊരുക്കുന്നു.