മൈക്രോ ഇറിഗേഷൻ പദ്ധതികൾ കാർഷിക മേഖലയെ ശക്തിപ്പെടുത്തും – ജലവിഭവ വകുപ്പ് മന്ത്രി റോഷി അഗസ്റ്റിൻ

കോട്ടയം: കാർഷിക മേഖലയിലെ ഉത്പാദനക്ഷമത വർധിപ്പിക്കാൻ മൈക്രോ ഇറിഗേഷൻ പദ്ധതികളുടെ സാധ്യതകൾ പരമാവധി പ്രയോജനപ്പെടുത്തണമെന്ന് ജലവിഭവ വകുപ്പ് മന്ത്രി റോഷി അഗസ്റ്റിൻ പറഞ്ഞു. കെ.എം. മാണി സാമൂഹിക സൂക്ഷ്മജലസേചന പദ്ധതിയുടെ ഭാഗമായ കുറവിലങ്ങാട് മൈക്രോ ഇറിഗേഷൻ പദ്ധതിയുടെ നിർമ്മാണോദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി.

കൃഷിയിടങ്ങളുടെ ഫലപുഷ്ടി വർധിപ്പിക്കുന്നതിന് ജലവിഭവ വകുപ്പും കൃഷി വകുപ്പും ചേർന്ന് നടപ്പാക്കുന്ന പദ്ധതികൾക്ക് സർക്കാർ മുൻഗണന നൽകുന്നുണ്ടെന്നും അദ്ദേഹം പറഞ്ഞു. ജൽജീവൻ മിഷൻ വഴി കഴിഞ്ഞ മൂന്ന് വർഷത്തിനിടെ സംസ്ഥാനത്തെ 41 ലക്ഷം കുടുംബങ്ങൾക്ക് കുടിവെളളം ലഭ്യമാക്കിയതായും മന്ത്രി അറിയിച്ചു.

ജില്ലയിലെ എല്ലാ വീടുകളിലും കുടിവെളളം എത്തിക്കാൻ 4,132 കോടി രൂപയും കടുത്തുരുത്തി നിയോജകമണ്ഡലത്തിന് 383 കോടി രൂപയും അനുവദിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

കുറവിലങ്ങാട് കാളിയർ തോട്ടം ജംഗ്ഷനിൽ നടന്ന ചടങ്ങിൽ മോൻസ് ജോസഫ് എം.എൽ.എ. അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡൻറ് ജോസ് പുത്തൻകാല, പഞ്ചായത്ത് അംഗങ്ങൾ, രാഷ്ട്രീയ നേതാക്കൾ, വിവിധ സ്ഥാപനങ്ങളുടെ പ്രതിനിധികൾ എന്നിവർ പങ്കെടുത്തു.