ഷോൺ ജോർജിന്റെ ഭീഷണി രാഷ്ട്രീയ നാടകമെന്ന് എംഎൽഎ സെബാസ്റ്റ്യൻ കുളത്തുങ്കൽ

പൂഞ്ഞാർ: കുടിവെള്ള പദ്ധതിയുടെ ഭാഗമായി വെട്ടിപ്പറമ്പ് റോഡ് പൊളിച്ചതിനെ തുടർന്ന് 20 ദിവസത്തിനകം ടാർ ചെയ്യാത്തപക്ഷം പൂഞ്ഞാർ എംഎൽഎ സെബാസ്റ്റ്യൻ കുളത്തുങ്കലിനെ തെക്കേക്കരയിൽ കാലുകുത്താൻ അനുവദിക്കില്ലെന്ന് ബിജെപി സംസ്ഥാന വൈസ് പ്രസിഡന്റ് ഷോൺ ജോർജ് മുന്നറിയിപ്പ് നൽകി.

ഒക്ടോബർ 10-നകം റോഡ് ടാർ ചെയ്യണമെന്നാവശ്യപ്പെട്ടാണ് ഷോൺ ജോർജ് താക്കീതും ഭീഷണിയും ഉയർത്തിയത്. "വെട്ടിപ്പറമ്പ് റോഡ് ഉടൻ ടാർ ചെയ്യണം, അല്ലെങ്കിൽ എംഎൽഎക്ക് ഇവിടെ വരാനാകില്ല" എന്നാണ് ഷോൺ ജോർജ് പ്രതികരിച്ചത്.

എന്നാൽ, ഇതിനുമുന്നേ തന്നെ റോഡ് ടാർ ചെയ്യാൻ തീരുമാനിച്ചിട്ടുണ്ടെന്നും, അതിന്മേലുള്ള പ്രതിഷേധം രാഷ്ട്രീയ നാടകമാണെന്നുമാണ് എംഎൽഎ സെബാസ്റ്റ്യൻ കുളത്തുങ്കലിന്റെ മറുപടി. “ഒക്ടോബർ 10-നകം ടാർ ചെയ്യാൻ തീരുമാനിച്ച കാര്യം അറിയാവുന്നതാണ്. അത് മനപ്പൂർവ്വം അവഗണിച്ചാണ് ഷോൺ ജോർജ് രാഷ്ട്രീയ നേട്ടം തേടുന്നത്,” എന്ന് അദ്ദേഹം പറഞ്ഞു.

ജൽജീവൻ മിഷൻ പദ്ധതി പ്രകാരം കൂട്ടിക്കൽ ഉൾപ്പെടെ ആറു പഞ്ചായത്തുകളിലേക്കുള്ള കുടിവെള്ള വിതരണത്തിനായാണ് പൂഞ്ഞാർ, തെക്കേക്കര, തീക്കോയി പഞ്ചായത്തുകളെ ബന്ധിപ്പിക്കുന്ന വെട്ടിപ്പറമ്പ് റോഡ് പൊളിച്ചത്.

വിഷയത്തിൽ ബിജെപിക്ക് മറുപടി നൽകാൻ കേരള കോൺഗ്രസ് (എം) സജ്ജമാകുന്നതായും റിപ്പോർട്ടുകളുണ്ട്.