എയ്ഡഡ് സ്കൂൾ മാനേജർമാരുടെ കൂട്ടധർണ്ണ കോട്ടയത്ത് തിരുവഞ്ചൂർ രാധാകൃഷ്ണൻ എം എൽ എ ഉദ്ഘാടനം ചെയ്തു

കോട്ടയം: ജില്ലയിലെ എയ്ഡഡ് സ്കൂൾ മാനേജർമാർ വിവിധ ആവശ്യങ്ങൾ ഉന്നയിച്ച് കോട്ടയം വിദ്യാഭ്യാസ ഉപഡയറക്ടറുടെ ഓഫീസിന് മുൻപിൽ കൂട്ടധർണ്ണ നടത്തി. കെ.പി.എസ്.എം.എ (നോൺ വെൽഫെയർ പ്രൈവറ്റ് സ്കൂൾ മാനേജേഴ്സ് അസോസിയേഷൻ) കോട്ടയം ജില്ലാ കമ്മിറ്റി നേതൃത്വത്തിലാണ് സമരം സംഘടിപ്പിച്ചത്.

ധർണ്ണയ്ക്ക് നേതൃത്വം നൽകിയത് സംസ്ഥാന ജനറൽ സെക്രട്ടറി ഡോ. മണി കൊല്ലമായിരുന്നു. ധർണ്ണ ഉദ്ഘാടനം ചെയ്ത് സംസാരിച്ച തിരുവഞ്ചൂർ രാധാകൃഷ്ണൻ എം.എൽ.എ, ഭിന്നശേഷി സംവരണം നടപ്പാക്കാൻ മാനേജർമാർ തയ്യാറാണെങ്കിലും, അത് പേരിൽ നിയമനങ്ങൾ തടയുന്നത് പൊതുവിദ്യാലയങ്ങളുടെ നിലനിൽപ്പിന് ഭീഷണിയാണെന്ന് ചൂണ്ടിക്കാട്ടി. സ്കൂൾ വാഹനങ്ങളിൽ ക്യാമറ സ്ഥാപിക്കാനുള്ള സമയപരിധിയും നീട്ടിക്കൊടുക്കണമെന്ന് അദ്ദേഹം ആവശ്യപ്പെട്ടു.

മാനേജർമാരെ സമൂഹത്തിൽ അപമാനിക്കുന്ന പ്രവണതയെ ചടങ്ങിൽ കല്ലട ഗിരീഷ് ശക്തമായി വിമർശിച്ചു. പൊതുവിദ്യാലയങ്ങളുടെ പ്രവർത്തനം തുടരാൻ മാനേജ്‌മെന്റുകൾ നേരിടുന്ന നിരവധി പ്രശ്നങ്ങൾ ധർണയിൽ അവതരിപ്പിച്ചു.

കൊരിച്ചൊരിയുന്ന മഴയിലും ജില്ലയിലെ സ്കൂൾ മാനേജർമാരുടെ സാന്നിധ്യം ധർണയെ ശ്രദ്ധേയമാക്കി. ജില്ലാ പ്രസിഡന്റ് ആർ. ഗോപീകൃഷ്ണൻ അധ്യക്ഷത വഹിച്ചു. ജില്ലാ ജനറൽ സെക്രട്ടറി ജോജി കരിമാങ്കൽ സ്വാഗതം ആശംസിച്ചു.

സംസ്ഥാന നേതാക്കളായ ഗുലാബ് ഖാൻ, കല്ലട ഗിരീഷ്, ജില്ലാരക്ഷാധികാരി കെ.എ. മുഹമ്മദ് അഷ്റഫ്, ജില്ലാ വൈസ്പ്രസിഡന്റ്മാരായ കെ.ആർ. വിജയൻ, കെ.എ. മുരളി, ട്രഷറർ മധുലാൽ എന്നിവർ പങ്കെടുത്തു.