എച്ച്-1ബി വിസ ഫീസ് കുത്തനെ ഉയർന്നു; ഐ.ടി ഓഹരികൾ തകർന്നു

അമേരിക്കയിൽ എച്ച്-1ബി വിസ ഫീസ് 1 ലക്ഷം ഡോളർ (88 ലക്ഷം രൂപ) ആക്കി ഉയർത്തിയതോടെ ഇന്ത്യൻ ഐ.ടി ഓഹരികൾ കനത്ത ഇടിവ് നേരിട്ടു. രാവിലത്തെ വ്യാപാരത്തിൽ ടി.സി.എസ്, ഇൻഫോസിസ്, വിപ്രോ, എച്ച്.സി.എൽ ടെക്, ടെക് മഹീന്ദ്ര, കോഫോർജ് എന്നിവ 3–6% വരെ നഷ്ടം രേഖപ്പെടുത്തി. നിഫ്റ്റി ഐ.ടി സൂചിക 3% താഴ്ന്ന് 35,482ൽ എത്തി.

പുതിയ വിസ നിയമം കമ്പനികളുടെ ലാഭക്ഷമതയിൽ 1.5% വരെ കുറവ് വരുത്താമെന്നാണ് വിലയിരുത്തൽ. നിലവിലുള്ള വിസ ഉടമകളെ ബാധിക്കാത്ത തീരുമാനം സെപ്റ്റംബർ 21ന് ശേഷം സമർപ്പിക്കുന്ന അപേക്ഷകൾക്കാണ് ബാധകം. ഹ്രസ്വകാലത്ത് അനിശ്ചിതത്വം നിലനിൽക്കുമെങ്കിലും, ദീർഘകാലത്ത് ഐ.ടി മേഖല പ്രതാപം തിരിച്ചുപിടിക്കുമെന്നാണ് വിദഗ്ധരുടെ പ്രതീക്ഷ.