ബാങ്ക് അക്കൗണ്ടുകളിൽ അവകാശികളില്ലാതെ 67,270 കോടി; ആർബിഐയുടെ പ്രത്യേക പദ്ധതി

ന്യൂഡൽഹി: രാജ്യത്തെ ബാങ്കുകളിൽ അവകാശികളില്ലാതെ കെട്ടിക്കിടക്കുന്ന നിക്ഷേപങ്ങളുടെ മൊത്തം തുക 67,270 കോടി രൂപയായി. കഴിഞ്ഞ 10 വർഷമായി ഇടപാടുകളൊന്നുമില്ലാതെയും ആരും അവകാശം ഉന്നയിക്കാതെയുമുള്ള അക്കൗണ്ടുകളിലാണ് ഇത്തരത്തിലുള്ള നിക്ഷേപങ്ങൾ കിടക്കുന്നത്.

സേവിംഗ്‌സ് അക്കൗണ്ടുകൾ, കാലാവധി കഴിഞ്ഞിട്ടും പുതുക്കാത്ത സ്ഥിരനിക്ഷേപങ്ങൾ (എഫ്ഡി), അക്കൗണ്ടുടമ മരിച്ചതിനുശേഷം അവകാശവാദം ഉണ്ടായിട്ടില്ലാത്ത നിക്ഷേപങ്ങൾ, ഡിവിഡന്റുകൾ, ഇൻഷുറൻസ് തുകകൾ എന്നിവയും ഇതിൽ ഉൾപ്പെടുന്നു.

അവകാശികളെ കണ്ടെത്തുന്നതിനായി ഒക്ടോബർ മുതൽ ഡിസംബർ വരെ നീളുന്ന പ്രത്യേക ക്യാംപെയ്ൻ റിസർവ് ബാങ്ക് സംഘടിപ്പിക്കുമെന്ന് അറിയിച്ചിട്ടുണ്ട്. പ്രധാനമായും ഗ്രാമീണവും അർധനഗര മേഖലയുമായിരിക്കും ക്യാംപെയ്‌ന്റെ കേന്ദ്രീകരണം. ബാങ്കുകൾക്ക് തന്നെ ഇത്തരം അക്കൗണ്ടുകളുടെ ഉടമകളെയും അവകാശികളെയും കണ്ടെത്താനുള്ള നിർദേശം നൽകിയിട്ടുണ്ട്.

‘അൺക്ലെയിമ്ഡ് ഡെപ്പോസിറ്റ്സ് ഗേറ്റ്‍വേ ടു ആക്സസ്’ (UDGAM) എന്ന പോർട്ടലിലൂടെ ഉപഭോക്താക്കൾക്ക് സ്വന്തമായോ ബന്ധുക്കളുടെ പേരിലോ കുടുങ്ങിക്കിടക്കുന്ന തുക ക്ലെയിം ചെയ്യാനുള്ള സൗകര്യവും ആർബിഐ ഒരുക്കിയിട്ടുണ്ട്.

അവകാശികളില്ലാതെ കിടക്കുന്ന അക്കൗണ്ടുകളിലെ പണം റിസർവ് ബാങ്കിന്റെ നിയന്ത്രണത്തിലുള്ള ഡെപ്പോസിറ്റർ എജ്യൂക്കേഷൻ ആൻഡ് അവയർനസ് (DEA) ഫണ്ടിലേക്കാണ് മാറ്റുന്നത്. ഇതിനകം പൊതുമേഖലാ ബാങ്കുകൾ 58,330 കോടി രൂപയും സ്വകാര്യ ബാങ്കുകൾ 8,634 കോടി രൂപയും ഡിഇഎ ഫണ്ടിലേക്കു കൈമാറിയിട്ടുണ്ട്.