സ്ത്രീധനപീഡനം സഹിക്കാനാവാതെ യുവതി ജീവനൊടുക്കി

ചെന്നൈ ∙ സ്ത്രീധനം ആവശ്യപ്പെട്ട് ഭർത്താവിന്റെയും ബന്ധുക്കളുടെയും പീഡനം സഹിക്കാനാവാതെ യുവതി ആത്മഹത്യ ചെയ്തു. മധുരയിലെ ഉസിലംപട്ടിക്ക് സമീപം പെരുമാൾകോവിൽപട്ടി സ്വദേശിനി പ്രിയദർശിനി (28)യാണ് മരിച്ചത്.

2024 സെപ്റ്റംബറിൽ പ്രിയദർശിനി സെല്ലൂർ സ്വദേശിയായ റൂബൻരാജുമായി വിവാഹിതയായിരുന്നു. വിവാഹവേളയിൽ 150 പവൻ സ്വർണമാണ് പെൺകുടുംബം നൽകിയത്. പിന്നീട് നൽകാമെന്ന് പറഞ്ഞിരുന്ന സ്വർണം നൽകാനാകാതെ വന്നതോടെയാണ് പ്രശ്‌നങ്ങൾ ഉണ്ടായതെന്ന് പ്രിയദർശിനിയുടെ മാതാപിതാക്കൾ അഗിനിയും സെൽവിയും ആരോപിച്ചു.

ഭർത്താവിന്റെ മാതാപിതാക്കൾ നിരന്തരം സ്വർണം ആവശ്യപ്പെട്ട് പീഡിപ്പിച്ചിരുന്നുവെന്നാണ് കുടുംബത്തിന്റെ പരാതി. ഇതിനെ തുടർന്ന് മാസങ്ങൾക്ക് മുൻപ് പ്രിയദർശിനി സ്വന്തം വീട്ടിലേക്ക് മടങ്ങിയിരുന്നു. അതിനിടെ ഭർത്താവിനായി കുടുംബം രണ്ടാമത്തെ വിവാഹം ആലോചിക്കുന്നതായി അറിഞ്ഞ പ്രിയദർശിനി വെള്ളിയാഴ്ച വിഷം കഴിച്ച് ജീവനൊടുക്കുകയായിരുന്നു.

മാതാപിതാക്കളുടെ പരാതിയുടെ അടിസ്ഥാനത്തിൽ മധുര പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.