പുതിയ ഭൂപതിവ് ചട്ടം നിയമസഭ സബ്ജക്ട് കമ്മിറ്റി അംഗീകരിച്ചു; വിജ്ഞാപനം ഒരാഴ്ചയ്ക്കുള്ളിൽ

തിരുവനന്തപുരം: സംസ്ഥാനത്തെ ഭൂപതിവ് ചട്ടത്തിൽ ഭേദഗതി കൊണ്ടുവരുന്നതിന് നിയമസഭ സബ്ജക്ട് കമ്മിറ്റി അംഗീകാരം നൽകി. പുതിയ ചട്ടങ്ങളെക്കുറിച്ചുള്ള വിജ്ഞാപനം സർക്കാർ ഒരാഴ്ചയ്ക്കുള്ളിൽ പുറത്തിറക്കും.

പട്ടയം അനുവദിച്ച ഭൂമിയിൽ വീടുകൾ നിർമ്മിച്ചിട്ടുണ്ടെങ്കിൽ ഭൂപതിവ് ചട്ടപ്രകാരം ഇനി ക്രമവൽക്കരണം ആവശ്യമായിരിക്കില്ല. ഇതോടെ സംസ്ഥാനത്തെ പട്ടയഭൂമിയിലെ ഏകദേശം 95% വീടുകൾക്കും ക്രമവൽക്കരണത്തിന് അപേക്ഷിക്കേണ്ട സാഹചര്യമില്ലാതാകും.

ചട്ടഭേദഗതിയുടെ പ്രധാനകാര്യങ്ങൾ:

റബ്ബർ കൃഷിക്കോ മറ്റ് പ്രത്യേക ആവശ്യങ്ങൾക്കോ അനുവദിച്ച ഭൂമിയിൽ നിർമിച്ച വീടുകൾക്കാണ് ക്രമവൽക്കരണം നിർബന്ധം.

പട്ടയരേഖകൾ ഇല്ലാത്തവർക്ക് നിജസ്ഥിതി സർട്ടിഫിക്കറ്റ് സമർപ്പിച്ച് ക്രമവൽക്കരണത്തിന് അപേക്ഷിക്കാം.

ടൂറിസം മേഖലയിൽപ്പെട്ട നിർമ്മാണങ്ങൾക്ക് ഈടാക്കുന്ന ഫീസ് 10%ൽ നിന്ന് 5% ആക്കി കുറച്ചു.

പുതിയ ഭൂപതിവ് ചട്ടം നടപ്പിലാകുന്നതോടെ പൊതുജനങ്ങൾക്ക് വലിയ ആശ്വാസമാകുമെന്ന് സർക്കാർ അറിയിച്ചു.