ദാദാ സാഹേബ് ഫാൽക്കെ പുരസ്കാരം മോഹൻലാലിന്

ന്യുഡൽഹി :ഇന്ത്യൻ സിനിമയിലെ പരമോന്നത ബഹുമതിയായ ദാദാ സാഹേബ് ഫാൽക്കെ പുരസ്കാരം പ്രശസ്ത നടൻ മോഹൻലാലിന്. 2023 ലെ പുരസ്കാരമാണ് ഇപ്പോൾ പ്രഖ്യാപിച്ചത്.

ഇന്ത്യൻ സിനിമയ്ക്ക് നൽകിയ സമഗ്ര സംഭാവനകൾ പരിഗണിച്ചാണ് പുരസ്കാരം. തലമുറകളെ പ്രചോദിപ്പിക്കുന്നതാണ് മോഹൻലാലിന്റെ സിനിമാ യാത്രകളെന്ന് പുരസ്കാര പ്രഖ്യാപനത്തിനൊപ്പം നൽകിയ കുറിപ്പിൽ പറയുന്നു. നടൻ, സംവിധായകൻ, നിർമാതാവ് എന്ന നിലയിൽ അദ്ദേഹത്തിന്റെ അതുല്യമായ പ്രതിഭയും വൈദഗ്ധ്യവും കഠിനാധ്വാനവും ഇന്ത്യൻ സിനിമാ ചരിത്രത്തിൽ സുവർണ സ്ഥാനമാണ് നേടിയതെന്നും കുറിപ്പിലുണ്ട്.

2025 സെപ്തംബർ 23-ന് നടക്കുന്ന എഴുപത്തിയൊന്നാമത് നാഷണൽ ഫിലിം അവാർഡ്സ് വേദിയിൽ വച്ചാണ് മോഹൻലാലിന് പുരസ്കാരം നൽകുന്നത്. കഴിഞ്ഞ വർഷം ബോളിവുഡ് നടൻ മിഥുൻ ചക്രവർത്തിയ്ക്കാണ് ഈ ബഹുമതി ലഭിച്ചത്. 2004-ൽ പ്രശസ്ത സംവിധായകൻ അടൂർ ഗോപാലകൃഷ്ണൻ ആണ് ഫാൽക്കെ പുരസ്കാരം നേടുന്ന അവസാനത്തെ മലയാളി.

രാജ്യത്തെ പ്രഥമ സമ്പൂർണ ഫീച്ചർ സിനിമയായ രാജ ഹരിശ്ചന്ദ്ര സംവിധാനം ചെയ്ത ദാദാ സാഹേബ് ഫാൽക്കെയുടെ സ്മരണ നിലനിർത്താനാണ് കേന്ദ്ര സർക്കാർ 1969-ൽ പുരസ്കാരം ആരംഭിച്ചത്.