മോഹൻലാലിന്റെ താടി വിവാദമാകുന്നു; സൈനിക യൂണിഫോമിൽ താടി വടിക്കാതെ എത്തിയതിൽ വിമർശനം

ന്യൂഡൽഹി: നടൻ മോഹൻലാലിന്റെ താടി ഇപ്പോൾ ദേശീയ തലത്തിൽ ചർച്ചയാകുന്നു. ടെറിട്ടോറിയൽ ആർമിയിൽ ലഫ്. കേണൽ (ഓണററി) പദവി വഹിക്കുന്ന താരത്തിന്റെ താടി വടിക്കാത്തതിനെതിരെ സൈനിക വിഭാഗങ്ങളിൽ തന്നെ പ്രതികരണങ്ങളുയരുകയാണ്.

ദാദാ സാഹേബ് ഫാൽക്കെ പുരസ്കാരം നേടിയതിന് പിന്നാലെ കരസേനാ മേധാവി ജനറൽ ഉപേന്ദ്ര ദ്വിവേദി മോഹൻലാലിന് കമൻഡേഷൻ കാർഡ് നൽകി ആദരിച്ചിരുന്നു. എന്നാൽ, ഈ ചടങ്ങിൽ സൈനിക യൂണിഫോമും ക്യാപും അണിഞ്ഞെത്തിയ താരം താടി വടിക്കാതിരുന്നതാണ് വിവാദത്തിന് കാരണമായത്.

സൈനിക ചട്ടങ്ങൾ പ്രകാരം യൂണിഫോം ധരിക്കുമ്പോൾ താടി വടിച്ചിരിക്കണമെന്നതാണ് രീതി. സിഖ് വിഭാഗക്കാർക്കു മാത്രമാണ് താടിയുമായി ബന്ധപ്പെട്ട ഇളവുകൾ അനുവദിച്ചിട്ടുള്ളത്.

ചടങ്ങിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതിനെ തുടർന്ന് നാവികസേന മുൻ മേധാവി അഡ്മിറൽ (റിട്ട.) അരുൺ പ്രകാശ് പ്രതികരിച്ചു. “യൂണിഫോം ധരിക്കുമ്പോൾ പാലിക്കേണ്ട അടിസ്ഥാന ചട്ടങ്ങളെക്കുറിച്ച് സേനാ ആസ്ഥാനത്ത് നിന്ന് വ്യക്തമായ മാർഗ്ഗനിർദ്ദേശം നൽകണം” എന്നായിരുന്നു അദ്ദേഹത്തിന്റെ ട്വിറ്റർ (X) കുറിപ്പ്.

താടിയുമായി ബന്ധപ്പെട്ട ഈ വിവാദത്തിൽ നിരവധി മുൻ സൈനിക ഉദ്യോഗസ്ഥരും അഭിപ്രായങ്ങൾ പങ്കുവെച്ചിട്ടുണ്ട്. എന്നാൽ മോഹൻലാൽ ഭാഗത്ത് നിന്ന് ഇതുവരെ പ്രതികരണം വന്നിട്ടില്ല.