ശബരിമല സ്വർണ്ണപ്പാളി വിവാദം മുക്കാനാണ് സിനിമാനടന്മാരുടെ വീടുകളിൽ റെയ്ഡ്: സുരേഷ് ഗോപി

പാലക്കാട്‌: ശബരിമലയിലെ സ്വർണ്ണപ്പാളി വിവാദം മുക്കാനാണ് സിനിമാനടന്മാരുടെ വീടുകളിൽ റെയ്ഡ് നടത്തിയതെന്ന് കേന്ദ്രമന്ത്രി സുരേഷ് ഗോപി ആരോപിച്ചു. രണ്ട് സിനിമാനടന്മാരെ ഇതിനിടയിൽ വലിച്ചിഴച്ചത് വിവാദം മറച്ചുവെക്കാനാണോയെന്ന് സംശയമുണ്ടെന്നും അദ്ദേഹം പറഞ്ഞു. “കേന്ദ്രമന്ത്രിയായതിനാൽ ഇപ്പോൾ കൂടുതൽ പറയുന്നില്ല. പ്രജാവിവാദവും സ്വർണ്ണചർച്ചയും മുക്കാൻ വേണ്ടിയാണ് ഈ നീക്കങ്ങൾ. എല്ലാം കുൽസിതമാണ്,” —  സുരേഷ് ഗോപി വ്യക്തമാക്കി.

ദുൽഖർ സൽമാൻ ഉൾപ്പെടെ പ്രമുഖ സിനിമാനടന്മാരുടെ വീടുകളിൽ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) നടത്തിയ റെയ്ഡിനെ തുടർന്നാണ് സുരേഷ് ഗോപിയുടെ പരാമർശം. പാലക്കാട് മലമ്പുഴയിലെ ‘കലുങ്ക് സംവാദം’ പരിപാടിയിൽ സംസാരിക്കുകയായിരുന്നു അദ്ദേഹം.

അതേസമയം, തുല്യത വരേണ്ടത് ഏകീകൃത സിവിൽ കോഡ് മുഖാന്തരമാണ് എന്നും സുരേഷ് ഗോപി അഭിപ്രായപ്പെട്ടു. “‘മുത്തലാഖ് നിരോധനം വന്നുവല്ലോ. സിവിൽ കോഡ് വരുമെന്ന് അമിത് ഷാ പറഞ്ഞുകഴിഞ്ഞു. ഭാരതീയർക്കായുള്ള നിയമമാണ് അത്. അതിനെതിരെ പള്ളിയിൽ പോയി പറയേണ്ടതില്ല,’” — എന്നും അദ്ദേഹം കൂട്ടിച്ചേർത്തു.

കൊച്ചി മെട്രോ പാലക്കാട് വഴി കോയമ്പത്തൂർ വരെ വിപുലീകരിക്കണമെന്ന് ആവശ്യപ്പെട്ട സുരേഷ് ഗോപി, “കേരളം സ്ഥലം ഏറ്റെടുത്ത് നൽകാത്തതുകൊണ്ടാണ് റെയിൽ വികസനം നിലക്കുന്നത്. സംസ്ഥാന സർക്കാർ സ്ഥലം എടുത്ത് നൽകിയാൽ എല്ലാ പ്രശ്നങ്ങളും പരിഹരിക്കാം, കൂടുതൽ ട്രാക്കുകൾ ഉറപ്പായും വരും,” — എന്നും വ്യക്തമാക്കി.