ജോസ് കെ. മാണിക്ക് യുഡിഎഫ് വാതിൽ തുറന്നേക്കും: അടൂർ പ്രകാശ്

തിരുവനന്തപുരം: കേരള കോൺഗ്രസ് (എം) നേതാവ് ജോസ് കെ. മാണി യുഡിഎഫിലേക്ക് തിരിച്ചുവരണമെന്ന് വ്യക്തിപരമായ അഭിപ്രായമെന്ന് യുഡിഎഫ് കൺവീനർ അടൂർ പ്രകാശ് വ്യക്തമാക്കി. ജോസ് കെ. മാണിക്ക് ആവശ്യമായ സംരക്ഷണം ലഭിക്കേണ്ടതുണ്ടെന്നും, “ഇവിടെയും അവിടെയും പോയി എന്തെങ്കിലും പറഞ്ഞിട്ട് കാര്യമില്ല” എന്നും അദ്ദേഹം പറഞ്ഞു.

യുഡിഎഫിൽ നിലവിൽ ചർച്ചകൾ പുരോഗമിക്കുകയാണെന്നും, കേരള കോൺഗ്രസ് (എം) മുന്നണിയിൽ ചേരുകയാണെങ്കിൽ സീറ്റുകളുടെ കാര്യത്തിൽ പിന്നീട് തീരുമാനമെടുക്കുമെന്നും അടൂർ പ്രകാശ് വ്യക്തമാക്കി. “അവർ വന്നാൽ എവിടെ സീറ്റ് നൽകണം, എങ്ങനെയായിരിക്കണം എന്നതെല്ലാം സമവായത്തോടെ തീരുമാനിക്കും. യുഡിഎഫ് ഇതുവരെ സീറ്റ് വിഭജനത്തെക്കുറിച്ച് ചർച്ച നടത്തിയിട്ടില്ല,” എന്നും അദ്ദേഹം പറഞ്ഞു.

ജോസ് കെ. മാണിയെ മാത്രമല്ല, മറ്റ് രാഷ്ട്രീയ നേതാക്കളുമായും യുഡിഎഫ് ചർച്ചകൾ നടത്തുന്നുണ്ടെന്ന് അടൂർ പ്രകാശ് കൂട്ടിച്ചേർത്തു. സിപിഐയിലെ ചില നേതാക്കളുമടക്കം പലരുമായി ചർച്ചകൾ പുരോഗമിക്കുന്നുണ്ടെന്നും, എന്നാൽ എല്ലാ ചർച്ചകളെയും തുറന്നുപറയുന്നത് അതിന്റെ പുരോഗതിക്ക് തിരിച്ചടിയാകാമെന്നും അദ്ദേഹം വ്യക്തമാക്കി.