വൻതാരയ്‌ക്കെതിരെ 195 ചോദ്യങ്ങളുമായി പ്രത്യേക അന്വേഷണ സംഘം

ന്യൂഡെൽഹി: അനന്ത് അംബാനിയുടെ ‘വൻതാര’ വന്യജീവി സംരക്ഷണ കേന്ദ്രത്തോട് 195 ചോദ്യങ്ങൾ ഉയർത്തി സുപ്രീം കോടതി നിയോഗിച്ച പ്രത്യേക അന്വേഷണ സംഘം. കഴിഞ്ഞ മാസമാണ് വൻതാരയെക്കുറിച്ച് അന്വേഷിക്കാൻ സുപ്രീം കോടതി ഉത്തരവിട്ടത്.

ജസ്റ്റിസ് ജെ. ചെലമേശ്വറിന്റെ നേതൃത്വത്തിലുള്ള പ്രത്യേക സംഘം വന്യജീവി സംരക്ഷണ കേന്ദ്രത്തിനെതിരായ പരാതികളിൽ അന്വേഷണം ആരംഭിച്ചിരിക്കുകയാണ്. ലോകത്തിലെ തന്നെ ഏറ്റവും വലിയ മൃഗസംരക്ഷണ പദ്ധതികളിലൊന്നായി 2024-ൽ ഗുജറാത്തിലെ ജാംനഗറിൽ 3,000 ഏക്കറിൽ വ്യാപിച്ച് പ്രവർത്തനം ആരംഭിച്ച വൻതാര റിലയൻസ് ഫൗണ്ടേഷന്റെ പിന്തുണയിലാണ് മുന്നേറുന്നത്.

എന്നാൽ, പരിസ്ഥിതി, വന്യജീവി, സാമ്പത്തിക ചട്ടങ്ങൾ ലംഘിച്ചെന്നാരോപിച്ച് സമർപ്പിച്ച ഹർജികളെയാണ് സുപ്രീം കോടതി പരിഗണിച്ചത്. മൃഗങ്ങളെ വിദേശത്തുനിന്നും ഇന്ത്യയിൽനിന്നും കൊണ്ടുവന്ന നടപടിക്രമങ്ങൾ നിയമാനുസൃതമാണോ, കള്ളപ്പണം വെളുപ്പിക്കൽ ഉണ്ടായോ, വന്യജീവി സംരക്ഷണ നിയമങ്ങൾ പാലിച്ചിട്ടുണ്ടോ തുടങ്ങിയ വിഷയങ്ങളാണ് അന്വേഷണ പരിധിയിൽ ഉൾപ്പെടുന്നത്.

ഇതുമായി ബന്ധപ്പെട്ട 195 ചോദ്യങ്ങൾക്ക് മറുപടി നൽകണമെന്ന് സംഘം വൻതാരയോട് ആവശ്യപ്പെട്ടിട്ടുണ്ട്. അന്വേഷണത്തിൽ സിബിഐ, എൻഫോഴ്സ്മെന്റ് ഡയറക്ടറേറ്റ് (ED) എന്നിവയും ഉൾപ്പെടുത്താൻ സാധ്യതയുണ്ടെന്നതാണ് റിപ്പോർട്ട്.