പാലിയേക്കര ടോള്‍ നിരോധനം നീട്ടി; ഹൈക്കോടതി ഉത്തരവ്

തൃശൂര്‍: പാലിയേക്കരയില്‍ ടോള്‍ പിരിവ് വിലക്കാനുള്ള ഉത്തരവ് ഹൈക്കോടതി ഡിവിഷന്‍ ബെഞ്ച് നീട്ടി. ഈ മാസം 30 വരെ ടോള്‍ നിരോധനം തുടരുമെന്നാണ് കോടതിയുടെ നിര്‍ദേശം. ജില്ലാ കളക്ടര്‍ നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് കോടതി ഉത്തരവ് പുറപ്പെടുവിച്ചത്.

സെപ്തംബര്‍ 22 മുതല്‍ വ്യവസ്ഥകളോടെ ടോള്‍ പിരിവിന് അനുമതി നല്‍കാമെന്ന് ഹൈക്കോടതി നേരത്തെ അറിയിച്ചിരുന്നു. എന്നാല്‍ അതിനിടയില്‍ മുരിങ്ങൂരിലെ സര്‍വീസ് റോഡില്‍ മണ്ണിടിഞ്ഞ സംഭവം ജില്ലാ കളക്ടര്‍ കോടതിയെ അറിയിക്കുകയായിരുന്നു. സംഭവം പരിശോധിച്ച കോടതി ടോള്‍ പിരിവിനുള്ള അനുമതി നിഷേധിച്ചു. തുടര്‍ന്ന് വിഷയത്തില്‍ സമഗ്ര പഠനം നടത്തി റിപ്പോര്‍ട്ട് സമര്‍പ്പിക്കാനും കോടതി കളക്ടര്‍ക്ക് നിര്‍ദേശം നല്‍കി.

മുരിങ്ങൂരിലെ പ്രശ്നം പൂര്‍ണമായി പരിഹരിക്കാത്തതിനാല്‍ സുരക്ഷാഭീഷണി നിലനില്‍ക്കുന്നതായും, അടിപ്പാത നിര്‍മ്മാണം നടക്കുന്ന പ്രദേശങ്ങളില്‍ എപ്പോഴും സമാന അപകടം സംഭവിക്കാമെന്നും കളക്ടറുടെ റിപ്പോര്‍ട്ടില്‍ പറയുന്നു.

അതേസമയം, ഇടക്കാല മാനേജ്മെന്റ് നിര്‍ദേശിച്ചിട്ടുള്ള എല്ലാ മാനദണ്ഡങ്ങളും പാലിക്കുന്നുണ്ടെന്നും, തുടര്‍ന്നും പാലിക്കുമെന്നും ദേശീയപാത അതോറിറ്റി കോടതിയെ അറിയിച്ചു. കളക്ടറുടെ റിപ്പോര്‍ട്ടിന് മറുപടി നല്‍കണമെന്ന കോടതി നിര്‍ദേശത്തോടെയാണ് ഹര്‍ജി ചൊവ്വാഴ്ച വീണ്ടും പരിഗണിക്കപ്പെടുക.