വിവാഹ വാഗ്ദാന പീഡന കേസ്; സർക്കാർ ഉദ്യോഗസ്ഥനെയെതിരായ എഫ്‌ഐആർ സുപ്രീംകോടതി റദ്ദാക്കി

ന്യൂഡൽഹി: വിവാഹ വാഗ്ദാനം നൽകി സഹപ്രവർത്തകയായ കമ്പ്യൂട്ടർ ഓപ്പറേറ്ററെ ബലാത്സംഗം ചെയ്‌തെന്നാരോപിച്ച് സർക്കാർ ഉദ്യോഗസ്ഥനെയെതിരായി രജിസ്റ്റർ ചെയ്ത എഫ്‌ഐആർ സുപ്രീംകോടതി റദ്ദാക്കി. പ്രതികാര നടപടിയുടെ ഭാഗമായി നൽകിയ പരാതിയായിരുന്നുവെന്ന് കണ്ടെത്തിയാണ് കോടതി നടപടി സ്വീകരിച്ചത്.

സുഹാഗി മുനിസിപ്പൽ കോർപ്പറേഷനിൽ അസിസ്റ്റന്റ് റെവന്യൂ ഇൻസ്‌പെക്ടറായി ജോലി ചെയ്യുന്ന സുരേന്ദ്ര ഖാവ്സെയാണ് കേസിലെ പ്രതി. യുവതി നേരത്തെ വിവാഹിതയും ഒരു മകന്റെ മാതാവുമാണെന്ന് കോടതി രേഖകളിൽ പറയുന്നു.

ഖാവ്സെ മേലധികാരികൾക്ക് യുവതിക്കെതിരെ പരാതി നൽകിയതിനെ തുടർന്ന് അവർക്കെതിരെ കാരണം കാണിക്കൽ നോട്ടീസ് പുറപ്പെടുവിച്ചിരുന്നു. ഇതിന് പിന്നാലെയാണ് യുവതി 2023 ഒക്ടോബർ 13-ന് പോലീസിൽ പരാതി നൽകിയത്. 2023 മാർച്ച് 15-ന് പ്രതി നിർബന്ധിച്ച് ലൈംഗിക ബന്ധത്തിൽ ഏർപ്പെട്ടുവെന്നും പിന്നീട് വിവാഹ വാഗ്ദാനം നൽകി ബന്ധം തുടരുകയായിരുന്നുവെന്നും 2023 ഏപ്രിൽ 10 വരെ ബന്ധം നിലനിന്നുവെന്നും യുവതി ആരോപിച്ചിരുന്നു.

എന്നാൽ, 2023 ഏപ്രിൽ 24-ന് യുവതി ആത്മഹത്യ ചെയ്യുമെന്ന് ഭീഷണിപ്പെടുത്തുകയും വിഷം കഴിക്കുകയും ചെയ്തതായി പ്രതി പോലീസിനും മുനിസിപ്പൽ അധികാരികൾക്കും പരാതി നൽകി. തുടർന്ന് അധികാരികൾ യുവതിക്കെതിരെ നടപടി സ്വീകരിച്ചിരുന്നു.

ഈ പശ്ചാത്തലത്തിൽ, നിയമപരവും ഭരണപരവുമായ നടപടികൾക്കെതിരെ പ്രതികാരത്തിനായാണ് കേസ് നൽകിയതെന്ന് കോടതി വിലയിരുത്തി. ആരോപിച്ച സംഭവത്തിന് നാല് മാസത്തിന് ശേഷമാണ് എഫ്‌ഐആർ നൽകിയതെന്നും അതിനാൽ അത് നിലനിൽക്കാനാവില്ലെന്നും ജസ്റ്റിസുമാരായ സഞ്ജയ് കരോൾ, എൻ. കോടീശ്വർ സിംഗ് എന്നിവരടങ്ങിയ ബെഞ്ച് വ്യക്തമാക്കി.

മധ്യപ്രദേശ് ഹൈക്കോടതി എഫ്‌ഐആർ റദ്ദാക്കാൻ വിസമ്മതിച്ച 2025 ജനുവരി 27-ലെ ഉത്തരവിനെതിരെ സുരേന്ദ്ര ഖാവ്സെ നൽകിയ അപ്പീലിലാണ് സുപ്രീംകോടതി ഇടപെട്ടത്.