സംസ്ഥാനത്തെ തദ്ദേശസ്ഥാപനങ്ങളുടെ അന്തിമ വോട്ടർപട്ടിക പ്രസിദ്ധീകരിച്ചു

തിരുവനന്തപുരം: സംസ്ഥാനത്തെ തദ്ദേശസ്ഥാപനങ്ങളുടെ അന്തിമ വോട്ടർപട്ടിക സെപ്തംബർ 2-ന് പ്രസിദ്ധീകരിച്ചു. പുതുക്കിയ പട്ടികയിൽ ആകെ 2,83,12,463 വോട്ടർമാർ ഉൾപ്പെട്ടിട്ടുണ്ട്.

ജൂലൈ 23-ന് പുറത്തുവിട്ട കരട് വോട്ടർപട്ടികയിൽ 2,68,78,258 പേരാണ് ഉണ്ടായിരുന്നത്. പുതുതായി 14 ലക്ഷത്തിലധികം പേരാണ് ചേർന്നത്.

പുതിയ പട്ടികപ്രകാരം:

പുരുഷന്മാർ: 1,33,52,945

സ്ത്രീകൾ: 1,49,59,242

ട്രാൻസ്‌ജെൻഡേഴ്സ്: 276

പ്രവാസി വോട്ടർമാർ: 2,067

2025 ജനുവരി 1-ന് അല്ലെങ്കിൽ അതിന് മുൻപ് 18 വയസ്സ് പൂർത്തിയാക്കിയവരാണ് പട്ടികയിൽ ഉൾപ്പെടുത്തിയിരിക്കുന്നത്.

ആകെ 941 ഗ്രാമപഞ്ചായത്തുകളിലെ 17,337 വാർഡുകൾ, 87 മുനിസിപ്പാലിറ്റികളിലെ 3,240 വാർഡുകൾ, ആറ് കോർപ്പറേഷനുകളിലെ 421 വാർഡുകൾ എന്നിവിടങ്ങളിലെ വോട്ടർമാരുടെ പട്ടികയാണ് തയ്യാറാക്കിയിരിക്കുന്നത്.

വോട്ടർപട്ടികയിൽ പേര് ചേർക്കാൻ 29,81,310 അപേക്ഷകളും, ഒഴിവാക്കാൻ 4,88,024 അപേക്ഷകളും ലഭിച്ചിരുന്നു. അപേക്ഷകളും ആക്ഷേപങ്ങളും പരിശോധിച്ച് ഹിയറിംഗ് നടത്തിയ ശേഷമാണ് അന്തിമ പട്ടിക തയ്യാറാക്കിയതെന്ന് മുഖ്യ തിരഞ്ഞെടുപ്പ് ഓഫീസർ അറിയിച്ചു.

പട്ടിക sec.kerala.gov.in വെബ്‌സൈറ്റിലും തദ്ദേശസ്ഥാപനങ്ങളിലും താലൂക്ക്, വില്ലേജ് ഓഫിസുകളിലും ലഭ്യമാണ്.