ആര്യന്‍ ഖാന്‍ കേസിനെ കുറിച്ച് മുകുള്‍ റോഹ്തഗിയുടെ വെളിപ്പെടുത്തല്‍

മുംബൈ: ലഹരി കേസില്‍പ്പെട്ട് ജയിലില്‍ കഴിയുന്ന മകന്‍ ആര്യന്‍ ഖാനെ മോചിപ്പിക്കാന്‍ ഷാറൂഖ് ഖാന്‍ വിവിധ ഓഫറുകളുമായി എത്തിയിരുന്നുവെന്ന് മുന്‍ സോളിസിറ്റര്‍ ജനറലും മുതിര്‍ന്ന അഭിഭാഷകനുമായ മുകുള്‍ റോഹ്തഗി വെളിപ്പെടുത്തി. റിപ്പബ്ലിക് ടിവിയോട് സംസാരിക്കവെയാണ് അദ്ദേഹം ഈ വെളിപ്പെടുത്തല്‍ നടത്തിയത്.

2021 ഒക്ടോബറില്‍ ആഡംബരക്കപ്പലിലെ റേവ് പാര്‍ട്ടിക്കിടെ എന്‍സിബി നടത്തിയ പരിശോധനയിലാണ് ആര്യന്‍ ഖാന്‍ ഉള്‍പ്പടെയുള്ളവര്‍ അറസ്റ്റിലായത്. തുടര്‍ന്ന് മൂന്ന് ആഴ്ച ജയിലില്‍ കഴിഞ്ഞ ശേഷമാണ് ആര്യന് ജാമ്യം ലഭിച്ചത്.

‘അന്നത്തെ സമയത്ത് ഞാന്‍ ലണ്ടനിലായിരുന്നു. ഷാറൂഖിന്റെ അടുത്ത സുഹൃത്ത് ആദ്യം എന്നെ ബന്ധപ്പെട്ടു. അവധിയൊഴിവാക്കാന്‍ താത്പര്യമില്ലാത്തതിനാല്‍ ഞാന്‍ നിരസിച്ചു. പിന്നീട് ഷാറൂഖ് തന്നെ വിളിച്ചു. അവസാനം ഭാര്യയോട് സംസാരിക്കാമോ എന്ന് ചോദിച്ചാണ് അദ്ദേഹം സമ്മതിപ്പിച്ചത്. “ഞാന്‍ ഒരു അച്ഛനാണ്, സാധാരണ ക്ലയന്‍റ് ആയി കാണരുത്” എന്ന് പറഞ്ഞ അദ്ദേഹത്തിന്റെ വാക്കുകള്‍ ഭാര്യയെ വിഷമിപ്പിച്ചു. അവര്‍ തന്നെയാണ് എന്നെ സമ്മതിപ്പിച്ചത്,’ റോഹ്തഗി പറഞ്ഞു.

ഷാറൂഖ് ലണ്ടനില്‍ നിന്ന് മുംബൈയിലെത്താന്‍ പ്രൈവറ്റ് ജെറ്റ് അയക്കാന്‍ പോലും തയ്യാറായിരുന്നുവെങ്കിലും അത് താന്‍ നിരസിച്ചുവെന്ന് അദ്ദേഹം വ്യക്തമാക്കി. ‘ഞാന്‍ എത്തിയപ്പോള്‍ ഷാറൂഖും അതേ ഹോട്ടലില്‍ മുറിയെടുത്ത് കേസുമായി ബന്ധപ്പെട്ട എല്ലാ വിവരങ്ങളും പോയിന്‍റുകളും എഴുതി കൊണ്ടുവന്നു. പിന്നീട് ബോംബെ ഹൈക്കോടതിയില്‍ വാദിച്ചു. അവസാനം ആര്യന് ജാമ്യം ലഭിച്ചു, പിന്നെ ഞാന്‍ തിരിച്ചുപോയി അവധി ആഘോഷിച്ചു,’ അദ്ദേഹം കൂട്ടിച്ചേര്‍ത്തു.

ആദ്യമായി ആര്യന്റെ വേണ്ടി സതീഷ് മാനേ ഷിന്‍ഡെ കോടതിയില്‍ ഹാജരായിരുന്നു. തുടര്‍ന്ന് അമിത് ദേശായിയും രംഗത്തെത്തി. കേസ് ഹൈക്കോടതിയിലെത്തിയപ്പോഴാണ് മുകുള്‍ റോഹ്തഗി വാദത്തിന് എത്തിയത്.