സാമ്പത്തിക പ്രതിസന്ധി മറികടക്കാൻ എം.ജി സർവകലാശാല വിദ്യാർത്ഥികളെ പിഴിയുന്നു

 കോട്ടയം : എം.ജി സർവകലാശാലയിൽ മേഴ്‌സി ചാൻസിന്റെ പേരിൽ വൻ ഫീസ് കൊള്ള. 3 വർഷ എൽ.എൽ.ബി കോഴ്‌സിലേക്കുള്ള പരീക്ഷാ ഫീസിലാണ് റെക്കോർഡ് വർധന. ഇതര ഫീസുകൾ കൂട്ടിയതിന് പിന്നാലെ, പരീക്ഷയിലെ അവസാന സാധ്യതയായ മേഴ്‌സി ചാൻസിലും സർവകലാശാല വിദ്യാർത്ഥികളിൽ നിന്ന് കൂറ്റൻ തുക പിരിക്കുന്നു.

കർണാടക സ്റ്റേറ്റ് ലോ യൂണിവേഴ്‌സിറ്റിയിൽ ഒരു പേപ്പറിന് 250 രൂപ മാത്രമാണെങ്കിൽ, എം.ജിയിൽ അത് 750 രൂപയായി വർധിപ്പിച്ചിട്ടുണ്ട്. പരീക്ഷാ ഫീസിന് പുറമേ സിവി ക്യാമ്പ് ഫീസായി ഓരോ പേപ്പറിനും 55 രൂപ കൂടി ഈടാക്കും. ഇപ്പോൾ പരീക്ഷാ ഫീസ് പേപ്പറിന് 650 രൂപയായി ഉയർന്നിട്ടുണ്ട്. പരമാവധി സൂപ്പർഫൈൻ 1290 രൂപ വരെയും അടയ്ക്കേണ്ടിവരും.

മേഴ്‌സി ചാൻസിനായി പ്രത്യേകം നിശ്ചയിച്ച ഫീസ് കൂടുതൽ ഭാരമേറുന്നതാണ്. ആദ്യമായി അപേക്ഷിക്കുന്നവർ 6,390 രൂപയും, രണ്ടാമത്തെ അവസരത്തിൽ 8,950 രൂപയും, മൂന്നാമത്തെയും അവസാനത്തെയും അവസരത്തിൽ 12,770 രൂപയും (നിശ്ചിത പരീക്ഷാ ഫീസിനും സിവി ക്യാമ്പ് ഫീസിനും പുറമേ) അടയ്ക്കണം.

സർവകലാശാലയുടെ സാമ്പത്തിക പ്രതിസന്ധിയാണ് കൂറ്റൻ ഫീസ് വർധനയ്ക്കുള്ള കാരണം എന്നാണ് റിപ്പോർട്ടുകൾ. യൂണിവേഴ്‌സിറ്റിക്ക് ഒരു വർഷം 26 കോടി രൂപ ചെലവുണ്ടാകുമ്പോൾ, അതിൽ 21 കോടി രൂപ ശമ്പള-പെൻഷൻ ബാധ്യതയ്ക്കും, 2 കോടി പരീക്ഷാ ചിലവിനും വേണ്ടി വരുന്നു. ഏപ്രിൽ മുതൽ ജൂലൈ വരെ സർവകലാശാലയ്ക്ക് 16 കോടി രൂപ മാത്രമേ ലഭിച്ചിട്ടുള്ളൂ. ഇത് സാമ്പത്തിക പ്രതിസന്ധി രൂക്ഷമാക്കിയതായി വിലയിരുത്തപ്പെടുന്നു.

അഫിലിയേറ്റഡ് കോളേജുകളിൽ പുതിയ കോഴ്സുകൾ ആരംഭിക്കാത്തതും പാഠ്യപദ്ധതി നവീകരിക്കാത്തതും മൂലം വിദ്യാർത്ഥികളുടെ എണ്ണം കുറഞ്ഞു വരികയും, 'സീപാസ്' വേർപെട്ടതുമാണ് യൂണിവേഴ്‌സിറ്റിയുടെ വരുമാനത്തെ ബാധിച്ചത്. എന്നാൽ ലോ കോളേജുകളിലെ പ്രവേശനം കുറഞ്ഞിട്ടില്ല. അതുകൊണ്ടാണ് നിയമ വിദ്യാർത്ഥികളെ ലക്ഷ്യമിട്ട് സർവകലാശാല ഗൂഢനീക്കമെന്ന രീതിയിൽ വൻ ഫീസ് വർധന നടപ്പാക്കുന്നതെന്ന് വിമർശനമുണ്ട്.

പരീക്ഷാ സംവിധാനത്തെ പുനസംഘടിപ്പിക്കണമെന്ന് വിവിധ വിഭാഗങ്ങളിൽ നിന്ന് ആവശ്യം ഉയരുന്നുണ്ടെങ്കിലും, എസ്.എഫ്.ഐ., കെ.എസ്.യു., എ.ബി.വി.പി. അടക്കമുള്ള വിദ്യാർത്ഥി സംഘടനകൾ മൗനം പാലിക്കുന്നതും വിമർശനത്തിന് ഇടയാക്കിയിട്ടുണ്ട്. വിദ്യാർത്ഥി സംഘടനകളെ നിയന്ത്രിക്കുന്ന രാഷ്ട്രീയ നേതാക്കൾ വിവിധ ട്രേഡ് യൂണിയനുകളിൽ അംഗങ്ങളായതിനാലാണ് ഈ നിലപാട് എന്ന് ചൂണ്ടിക്കാണിക്കുന്നു.