“കുട്ടി ഡ്രൈവർമാർക്ക് ബ്രേക്ക്: ‘നോ കീ ഫോർ കിഡ്സ്’ ക്യാമ്പയിനുമായി മോട്ടോർ വാഹന വകുപ്പ്”

പതിനെട്ട് വയസ്സ് തികയുംമുമ്പ് വാഹനവുമായി റോഡിലിറങ്ങുന്ന കുട്ടി ഡ്രൈവർമാർക്കെതിരെ മോട്ടോർ വാഹന വകുപ്പ് കര്‍ശന നടപടികൾക്ക് ഒരുങ്ങുന്നു. വകുപ്പ് പ്രഖ്യാപിച്ചിട്ടുള്ള ‘നോ കീ ഫോർ കിഡ്സ്’ പ്രചാരണത്തിന്റെ ഭാഗമായാണ് പരിശോധന നടത്തുന്നത്.

സ്കൂൾ പരിസരങ്ങളിലും പൊതുയിടങ്ങളിലും പ്രത്യേക ശ്രദ്ധകേന്ദ്രീകരിച്ച് എന്‍ഫോഴ്സ്മെന്റ് വിഭാഗം പരിശോധന നടത്തും. ആദ്യഘട്ടത്തിൽ പിടിക്കപ്പെടുന്ന കുട്ടി ഡ്രൈവർമാരെയും രക്ഷിതാക്കളെയും ബോധവത്കരണ ക്ലാസുകളിൽ പങ്കെടുപ്പിക്കും. എന്നാൽ വീണ്ടും പിടിക്കപ്പെട്ടാൽ ലൈസൻസ് ഇല്ലാതെ ഡ്രൈവ് ചെയ്തതിന് 10,000 രൂപ പിഴ, രക്ഷിതാവിനോ വാഹന ഉടമയ്ക്കോ 25,000 രൂപ പിഴ, ഒരു വർഷം വരെ തടവ്, വാഹനത്തിന്റെ രജിസ്ട്രേഷൻ റദ്ദാക്കൽ, കൂടാതെ ജുവനൈൽ നിയമപ്രകാരമുള്ള നടപടി നേരിടേണ്ടിവരും.

സാമൂഹ്യമാധ്യമങ്ങളിലൂടെ ബോധവത്കരണം, കുട്ടികൾക്ക് വാഹനം നൽകുന്നവരെക്കുറിച്ചുള്ള ഓൺലൈൻ സർവേ എന്നിവയും പ്രചാരണത്തിന്റെ ഭാഗമാകും.

കാസർകോട് ഓട്ടോഡ്രൈവറുടെ മരണത്തിനിടയാക്കിയ അപകടത്തിൽ വാഹനം ഓടിച്ചിരുന്നത് 16 കാരനാണെന്ന് കണ്ടെത്തിയതോടെയാണ് വകുപ്പ് ശക്തമായ നടപടി സ്വീകരിക്കാൻ തീരുമാനിച്ചത്.