കാബൂളിൽ ഇന്റർനെറ്റ് നിരോധനം: അഫ്ഗാനിൽ വിമാന, ബാങ്കിങ് മേഖലകൾ സ്തംഭിച്ചു

കാബൂൾ: താലിബാൻ ഭരണകൂടം രാജ്യത്തുടനീളം ഇന്റർനെറ്റ് സേവനങ്ങൾ വിച്ഛേദിച്ചതോടെ അഫ്ഗാനിസ്താനിലെ വിമാനത്താവളങ്ങളും ബാങ്കിങ് മേഖലയുമൊക്കെ നിലച്ചിരിക്കുകയാണ്. തിങ്കളാഴ്ച വൈകീട്ട് ആരംഭിച്ച നിരോധനത്തിന് കാരണം ഔദ്യോഗികമായി വ്യക്തമാക്കിയിട്ടില്ലെങ്കിലും, സദാചാരനിയമങ്ങൾ ശക്തിപ്പെടുത്തുന്നതിന്റെ ഭാഗമാണെന്നാണ് റിപ്പോർട്ടുകൾ.

ഇന്റർനെറ്റ് അധാർമികമാണെന്നതാണ് താലിബാന്റെ നിലപാട്. ഇതിന്റെ ഭാഗമായി, കഴിഞ്ഞ ആഴ്ചകളായി വിവിധ പ്രവിശ്യകളിലെ ഫൈബർ ഒപ്റ്റിക് കണക്ഷനുകൾ വിച്ഛേദിച്ചുവരികയായിരുന്നു. എന്നാൽ തലസ്ഥാനമായ കാബൂളിൽ സേവനം നിലച്ചത് തിങ്കളാഴ്ച വൈകീട്ട് പ്രവൃത്തിദിവസം അവസാനിച്ചതിന് പിന്നാലെയാണ്.

വിമാന സർവീസുകൾ റദ്ദാക്കി

ഇന്റർനെറ്റ് വിച്ഛേദനത്തെ തുടർന്ന് കാബൂൾ വിമാനത്താവളം പൂർണമായും സ്തംഭിച്ചിരിക്കുകയാണ്. കാബൂളിൽ നിന്നുള്ള പല വിമാനങ്ങളും റദ്ദാക്കപ്പെട്ടുവെന്ന് ബിബിസി റിപ്പോർട്ട് ചെയ്തു. വ്യാഴാഴ്ച വരെ സർവീസുകളില്ലെന്ന് നിരവധി വിമാനക്കമ്പനികൾ യാത്രക്കാരെ അറിയിച്ചു.

ബാങ്കിങ്, ഓൺലൈൻ പഠനം, ആശയവിനിമയം ബാധിച്ചു

ഓൺലൈൻ ബാങ്കിങ് അടക്കം രാജ്യത്തെ സാമ്പത്തിക ഇടപാടുകൾ തടസ്സപ്പെട്ടിരിക്കുകയാണ്. വിദ്യാർത്ഥികൾക്കും യുവാക്കൾക്കും ലോകവുമായി ബന്ധപ്പെടാനുള്ള ഏക മാർഗമായിരുന്ന ഓൺലൈൻ പഠനവും വരുമാനമാർഗങ്ങളും പൂർണ്ണമായും തകരാറിലായി.

സ്ത്രീകളുടെ പ്രതീക്ഷ തകർന്നു

2021-ൽ അധികാരത്തിലെത്തിയതിന് പിന്നാലെ 12 വയസ്സിന് മുകളിൽ പ്രായമുള്ള പെൺകുട്ടികളുടെ വിദ്യാഭ്യാസവും സ്ത്രീകളുടെ തൊഴിലും നിരോധിച്ചിരുന്നതോടെ, ഇവർക്ക് ഏക ആശ്രയം ഓൺലൈൻ പഠനമായിരുന്നു. എന്നാൽ, ഇപ്പോഴത്തെ നടപടി അതും ഇല്ലാതാക്കി.

“അടുത്തിടെയാണ് ഓൺലൈൻ സർവകലാശാലാ കോഴ്‌സിൽ ചേർന്നത്. പഠനം കഴിഞ്ഞ് ഒരു ജോലി ലഭിക്കുമെന്നായിരുന്നു പ്രതീക്ഷ. എന്നാൽ ഇന്നോടെ ആ സ്വപ്നം തകർന്നുവെന്നു തോന്നുന്നു,” എന്നാണ് ഫഹിമ നൂരി (യഥാർത്ഥ പേരല്ല) ബിബിസിയോട് പറഞ്ഞത്.

തഹ്കർ പ്രവിശ്യയിൽ നിന്നുള്ള വിദ്യാർത്ഥിനി ഷാക്കിബയും പ്രതികരിച്ചു: “ഞങ്ങൾക്ക് പഠിക്കണം, ജോലി വാങ്ങണം, ജനങ്ങളെ സഹായിക്കണം. എന്നാൽ ഇന്റർനെറ്റ് നിരോധിച്ചതോടെ ലോകം മുഴുവൻ ഇരുണ്ടുപോയതായി തോന്നുന്നു.”

യു.എൻ ഇടപെടൽ

ഇന്റർനെറ്റ് സേവനങ്ങൾ എത്രയും വേഗം പുനഃസ്ഥാപിക്കണമെന്ന് ഐക്യരാഷ്ട്രസഭ താലിബാനോട് ആവശ്യപ്പെട്ടിട്ടുണ്ട്. എന്നാൽ നിരോധനം എപ്പോൾ അവസാനിക്കും എന്നതിൽ വ്യക്തതയില്ല.