അടിമാലിയിലെ ‘പിച്ചച്ചട്ടി സമരം’ നടത്തിയ അന്നക്കുട്ടി അന്തരിച്ചു

അടിമാലി: ക്ഷേമപെൻഷൻ കുടിശ്ശികയ്ക്കുവേണ്ടി പിച്ചച്ചട്ടി എടുത്ത് സമരം ചെയ്ത് വാർത്തകളിൽ ഇടം നേടിയ പൊളിഞ്ഞപാലം താന്നിക്കുഴിയിലെ അന്നം ഔസേപ്പ് (അന്നക്കുട്ടി – 87) അന്തരിച്ചു. ബുധനാഴ്ച വൈകീട്ട് നാല് മണിയോടെ അടിമാലിയിലെ സ്വകാര്യ ആശുപത്രിയിലായിരുന്നു അന്ത്യം.

2023 നവംബർ 8-ന് അടിമാലി ഇരുന്നൂറേക്കർ പൊന്നിരുത്തുംപാറയിലെ മറിയക്കുട്ടിയുമൊത്ത്, പെൻഷൻ കുടിശ്ശിക അടച്ചുതീർക്കണമെന്നും പാവങ്ങളോട് നീതി കാണിക്കണമെന്നും ആവശ്യപ്പെട്ട്, പിച്ചച്ചട്ടി കൈയിൽ പിടിച്ച് അടിമാലി ടൗണിൽ ഇരുവരും നടത്തിയ പ്രതിഷേധം സംസ്ഥാനത്തുടനീളം ശ്രദ്ധ നേടിയിരുന്നു. "കറന്റ് ബിൽ അടയ്ക്കാൻ നിവൃത്തിയില്ല" എന്ന് രേഖപ്പെടുത്തിയ പ്ലക്കാർഡുമായി നടത്തിയ സമരം പൊതുജനങ്ങളും പ്രതിപക്ഷവും ഏറ്റെടുത്തതോടെ സർക്കാർ അടിയന്തരമായി ഒരു മാസത്തെ പെൻഷൻ അനുവദിച്ചിരുന്നു.

സമരകാലത്ത് രാഷ്ട്രീയ-സാമൂഹിക രംഗത്തെ നിരവധി പ്രമുഖർ ഇവരെ കാണാനെത്തി. കോൺഗ്രസ് നേതാവ് രമേശ് ചെന്നിത്തലയും തൃശ്ശൂർ എംപിയും നടനുമായ സുരേഷ് ഗോപിയും അടക്കമുള്ളവർ ഇവരെ നേരിൽ കണ്ടു പിന്തുണ പ്രഖ്യാപിച്ചിരുന്നു. സർക്കാർ പെൻഷൻ ലഭിക്കുന്നതുവരെ പ്രതിമാസം 1600 രൂപ വീതം സഹായം നൽകുമെന്നും ഇരുവരും ഉറപ്പുനൽകിയിരുന്നു.

ബന്ധുക്കളുടെ ആരോപണമനുസരിച്ച്, അന്നക്കുട്ടിക്ക് ഇപ്പോഴും പെൻഷൻ കുടിശ്ശിക ലഭിക്കാനുണ്ടെന്നാണ് വിവരം. പരേതനായ ഔസേപ്പ് ആണ് ഭർത്താവ്. മക്കൾ: പരേതരായ ഗ്രേസി, നൈനച്ചൻ, മറിയം. സംസ്കാരം വ്യാഴാഴ്ച നടക്കും.