കൊടുവള്ളി പോലീസ് സ്റ്റേഷൻ മുൻ ഇൻസ്പെക്ടർ കെ.പി. അഭിലാഷിനു സസ്‌പെൻഷൻ

കോഴിക്കോട്: യൂത്ത് ലീഗും യൂത്ത് കോൺഗ്രസ് പ്രവർത്തകരും ചേർന്ന് പോലീസ് സ്റ്റേഷനിൽ ജന്മദിന കേക്ക് മുറിച്ചതിനെ തുടർന്നുണ്ടായ വിവാദത്തിൽ കൊടുവള്ളി പോലീസ് സ്റ്റേഷൻ മുൻ ഇൻസ്പെക്ടർ കെ.പി. അഭിലാഷിനെ സർവീസിൽ നിന്നും സസ്‌പെൻഡ് ചെയ്തു.

വിവാദം ശക്തമായതിനെ തുടർന്ന് മുമ്പ് അഭിലാഷിനെ ക്രൈംബ്രാഞ്ചിലേക്ക് മാറ്റിയിരുന്നു. എന്നാൽ, അധികാര ദുരുപയോഗവും നിയമവിരുദ്ധ ബന്ധങ്ങളും സംബന്ധിച്ച ഗുരുതരമായ ആരോപണങ്ങളാണ് ഇപ്പോൾ അദ്ദേഹത്തിനെതിരെ ഉന്നയിക്കപ്പെട്ടിരിക്കുന്നത്.

അഡീഷണൽ ഡയറക്ടർ ജനറൽ ഓഫ് പോലീസ് (ഇന്റലിജൻസ്) സമർപ്പിച്ച റിപ്പോർട്ടിൽ, അഭിലാഷ് കുറ്റവാളികളുമായും ഗുണ്ട, എൻഡിപിഎസ് കേസുകളിലെ പ്രതികളുമായും ബന്ധം പുലർത്തിയതായും ചിലരിൽ നിന്ന് സംശയാസ്പദമായ സാമ്പത്തിക ഇടപാടുകൾ വഴിയുള്ള ഗണ്യമായ തുകകൾ അദ്ദേഹത്തിന്റെ ബാങ്ക് അക്കൗണ്ടിലേക്ക് ക്രെഡിറ്റ് ചെയ്തതായും വ്യക്തമാക്കുന്നു.

റിപ്പോർട്ടിന്റെ അടിസ്ഥാനത്തിൽ എഡിജിപി (ഇന്റലിജൻസ്) കൂടുതൽ അന്വേഷണം ആവശ്യപ്പെട്ടിട്ടുണ്ട്. അന്വേഷണ റിപ്പോർട്ട് പരിശോധിച്ച ഭരണകൂടം, അഭിലാഷ് ഗുരുതരമായ അച്ചടക്കലംഘനവും അധികാര ദുരുപയോഗവും നടത്തിയതായി പ്രഥമദൃഷ്ട്യാ കണ്ടെത്തിയതായി വ്യക്തമാക്കി.

ഈ സാഹചര്യത്തിലാണ് അച്ചടക്ക നടപടി പൂർത്തിയാകുന്നതുവരെ കെ.പി. അഭിലാഷിനെ സർവീസിൽ നിന്ന് സസ്‌പെൻഡ് ചെയ്ത് ഉത്തരവിട്ടത്. ഇയാളുടെ മേൽ വിശദമായ അന്വേഷണം ആരംഭിച്ചിട്ടുണ്ട്.