വാഗമണിൽ കൃത്രിമ സ്ഫോടനം; സുരേഷ് ഗോപി ചിത്രത്തിന്റെ ഷൂട്ടിംഗിൽ പരിഭ്രാന്തിയിലായി നാട്ടുകാർ

വാഗമൺ ∙ സുരേഷ് ഗോപി അഭിനയിക്കുന്ന പുതിയ സിനിമയുടെ ചിത്രീകരണത്തിന്റെ ഭാഗമായി നടത്തിയ കൃത്രിമ ബോംബ് സ്ഫോടനം വാഗമണിൽ വലിയ പരിഭ്രാന്തി സൃഷ്ടിച്ചു. വെള്ളിയാഴ്ച രാവിലെ അഞ്ചരയ്ക്കും ആറിനും ഇടയിലായിരുന്നു സംഭവം.

വാഗമൺ ഫാക്ടറി പ്രദേശത്താണ് സ്ഫോടനം നടന്നത്. സിനിമാ സെറ്റിനായി നിർമ്മിച്ച കെട്ടിടത്തിന്റെ മാതൃക പെട്ടെന്ന് വലിയ ശബ്ദത്തോടെ പൊട്ടിത്തെറിച്ചതോടെ സമീപ പ്രദേശങ്ങൾ മുഴുവൻ ഞെട്ടലിലായി. അപ്രതീക്ഷിതമായ വൻ ശബ്ദം കേട്ട് പലരും ഭൂകമ്പമെന്ന് കരുതി വീടുകളിൽ നിന്ന് പുറത്തിറങ്ങി.

ശേഷം മാത്രമാണ് സംഭവം സുരേഷ് ഗോപി നായകനായ സിനിമയുടെ ഷൂട്ടിംഗിന്റെ ഭാഗമായുള്ള കൃത്രിമ പൊട്ടിത്തെറിയാണെന്ന് നാട്ടുകാർ മനസിലാക്കിയത്. ഭീതിയിലായ നാട്ടുകാർ പിന്നീട് സ്ഥലത്ത് എത്തി പ്രതിഷേധം രേഖപ്പെടുത്തി.

പ്രതിഷേധങ്ങൾക്ക് മറുപടിയായി “ഇത് ഒരു തമാശയായി കാണൂ” എന്നായിരുന്നു ചിത്രത്തിന്റെ അണിയറപ്രവർത്തകരുടെ പ്രതികരണം.

അതേസമയം, തങ്ങളുടെ അനുമതിയില്ലാതെയാണ് പൊട്ടിത്തെറിരംഗം ചിത്രീകരിച്ചതെന്ന് പൊലീസ് വ്യക്തമാക്കി. സംഭവം സംബന്ധിച്ച് അന്വേഷണം ആരംഭിച്ചിട്ടുണ്ടെന്ന് പൊലീസ്  അറിയിച്ചു.