ജീവനക്കാർക്കും പെൻഷൻകാർക്കും നവരാത്രി–ദീപാവലി സമ്മാനം: ഡിഎ, ഡിആർ മൂന്ന് ശതമാനം വർധിപ്പിച്ചു

ന്യൂഡൽഹി: നവരാത്രിയും ദീപാവലിയുമൊക്കെയായി ജീവനക്കാർക്കും പെൻഷൻകാർക്കും സന്തോഷവാർത്ത. കേന്ദ്ര സർക്കാർ ജീവനക്കാരുടെ ക്ഷാമബത്ത (ഡിഎ)യും പെൻഷൻകാരുടെ ക്ഷാമാശ്വാസവും (ഡിആർ) മൂന്നു ശതമാനം വർധിപ്പിച്ച് കേന്ദ്ര സർക്കാർ ഉത്തരവ് പുറപ്പെടുവിച്ചു.

ഇതിലൂടെ 49 ലക്ഷം കേന്ദ്ര സർക്കാർ ജീവനക്കാർക്കും 69 ലക്ഷം പെൻഷൻകാർക്കും  അധിക ധനലാഭം ലഭിക്കും. ഡിഎയും ഡിആറും കൂട്ടിയതോടെ സർക്കാരിന്റെ പ്രതിവർഷ അധിക ധനബാധ്യത ഏകദേശം 10,083.96 കോടി രൂപയായിരിക്കുമെന്ന് കേന്ദ്രം അറിയിച്ചു.

ഏഴാം കേന്ദ്ര ശമ്പള കമ്മീഷന്റെ ശുപാർശകളെ അടിസ്ഥാനമാക്കിയാണ് വർധന നടപ്പാക്കിയതെന്നും സർക്കാർ വ്യക്തമാക്കി.

ഈ വർഷം മാർച്ചിൽ കേന്ദ്ര സർക്കാർ ജീവനക്കാരുടെ ഡിഎ രണ്ട് ശതമാനം വർധിപ്പിച്ചിരുന്നു.