ഈരാറ്റുപേട്ട എസ്.ഐക്കെതിരെ യൂത്ത് ലീഗ് നേതാവിന്റെ സോഷ്യൽ മീഡിയ കുറിപ്പ് വിവാദത്തിൽ

ഈരാറ്റുപേട്ട ∙ പോലീസ് സ്റ്റേഷനിലെ എസ്.ഐ നാടിന്റെ ദുരന്തമായി മാറരുതെന്ന് ആവശ്യപ്പെട്ടുകൊണ്ട് യൂത്ത് ലീഗ് നേതാവ് അമീൻ പിട്ടയിൽ സോഷ്യൽ മീഡിയയിൽ കുറിപ്പ് പങ്കുവെച്ചു. അമീന്റെ കുറിപ്പിന് പിന്നാലെ നിരവധി പേർ തങ്ങൾക്ക് നേരിട്ട ദുരനുഭവങ്ങൾ കമന്റുകളിലൂടെ പങ്കുവെച്ചതോടെ സംഭവം വിവാദമായി.

സന്തോഷ് കുമാർ എന്ന പേരിലുള്ള എസ്.ഐക്കെതിരെയാണ് അമീൻ ഗുരുതരമായ വിമർശനവുമായി രംഗത്തെത്തിയത്.

അമീന്റെ കുറിപ്പ്

“ഈരാറ്റുപേട്ട പോലീസ് സ്റ്റേഷനിലെ സന്തോഷ് കുമാർ എന്ന എസ്.ഐ നാടിന്റെ ദുരന്തമായി മാറരുത്. നിയമം നടപ്പാക്കുന്നതിന് തടസ്സമില്ലെങ്കിലും, അത് വാശി തീർക്കലാകരുത്. വാഹന ചെക്കിംഗ് സമയത്ത് മനുഷ്യരെ അവഹേളിക്കുന്ന പരാമർശങ്ങളും മോശം വർത്തമാനങ്ങളും പറയുന്നത് പതിവാണ്. ചെറിയ കാര്യങ്ങൾക്ക് പോലും ഭീമമായ തുക പിഴയായി ആവശ്യപ്പെടുന്നു.

അൽപം കുറച്ച് തരാമോ എന്ന് സ്വാഭാവികമായി ചോദിച്ചപ്പോൾ, ചെറുകച്ചവടത്തിനായി ഒമിനിയിൽ പോയ യുവാവിനോട് എസ്.ഐ പറഞ്ഞ മറുപടി അസഭ്യമായിരുന്നു. ‘മച്ചി പശുവിനെ കൊണ്ട് കറവ എടുപ്പിക്കുന്ന നാട്ടുകാരല്ലേ നിങ്ങൾ’ എന്നും, ‘ചെത്തിയതിന്റെ ഓളം കാണിക്കരുത്’ എന്നും പറഞ്ഞുവെന്നാണ് വിവരം. ഇത്തരത്തിലുള്ള പെരുമാറ്റം പലരും നേരിട്ടിട്ടുണ്ടെന്നും, നിരവധിപേരാണ് എസ്.ഐയുടെ അവഹേളനങ്ങൾക്ക് ഇരയായതെന്നും അറിയുന്നു.

ഫൈനുകൾ ഈടാക്കട്ടെ, വാഹന ചെക്കിംഗുകൾ നടത്തട്ടെ. പക്ഷേ വായിൽ നിന്നും സഭ്യമല്ലാത്ത വർത്തമാനം പറയുന്ന ഉദ്യോഗസ്ഥരെ ഇവിടെ നിന്ന് മാറ്റണമെന്ന് മേലുദ്യോഗസ്ഥരോട് അപേക്ഷിക്കുന്നു,” എന്നാണ് അമീൻ പിട്ടയിൽ കുറിച്ചത്.

പ്രതികരണങ്ങൾ

അമീന്റെ പോസ്റ്റിന് പിന്നാലെ നിരവധി പേർക്ക് നേരത്തെ ഉണ്ടായ അനുഭവങ്ങളും സമൂഹ മാധ്യമങ്ങളിൽ പുറത്തുവന്നു. സാധാരണക്കാരെ അധിക്ഷേപിക്കുന്ന രീതിയിൽ പെരുമാറുന്നുവെന്ന ആരോപണങ്ങൾ കൂടുതൽ ശക്തമായി ഉയർന്നിട്ടുണ്ട്