വടക്കാഞ്ചേരി സിഐ ഷാജഹാനെതിരെ കെ.എസ്.യു. ജില്ലാ പ്രസിഡന്റ് ഗോകുല്‍ ഗുരുവായൂര്‍

ചേലക്കരയിലെ കെ.എസ്.യു.–എസ്.എഫ്.ഐ. സംഘർഷത്തെ തുടർന്ന് കെ.എസ്.യു. പ്രവർത്തകരെ പൊലീസ് അറസ്റ്റുചെയ്ത സംഭവത്തിൽ പ്രതിഷേധം ശക്തമാകുന്നു. തൃശ്ശൂർ കെ.എസ്.യു. ജില്ലാ പ്രസിഡന്റ് ഗോകുല്‍ ഗുരുവായൂർ വടക്കാഞ്ചേരി സിഐ ഷാജഹാനെതിരെ തുറന്ന വിമർശനവുമായി രംഗത്തെത്തി.

ഫേസ്ബുക്ക് പോസ്റ്റിലൂടെയാണ് ഗോകുൽ പ്രതികരിച്ചത്. “സഹപ്രവർത്തകരെ അപമാനിച്ച, അവരെ വേദനിപ്പിച്ച ഒരാളെയും വെറുതെ വിടില്ല. ഷാജഹാനെ കരുതിയിരുന്നോ?” – എന്നാണ് അദ്ദേഹത്തിന്റെ കുറിപ്പ്.

സംഘർഷവുമായി ബന്ധപ്പെട്ട് ജില്ലാ വൈസ് പ്രസിഡന്റ് ഗണേഷ് ആറ്റൂർ ഉൾപ്പെടെ മൂന്ന് പേരെയാണ് പൊലീസ് അറസ്റ്റ് ചെയ്തത്. ഇവരെ ഭീകരവാദികളെ കൊണ്ടുപോകുന്നതുപോലെ മുഖംമൂടി ധരിപ്പിച്ച് കോടതിയിൽ ഹാജരാക്കിയ നടപടി വിവാദമായി.

മുഖംമൂടി ഊരിമാറ്റാൻ കോടതിയിൽ നിന്ന് പുറത്തിറങ്ങുമ്പോഴും പൊലീസ് തയ്യാറായില്ലെന്നതാണ് പ്രതിഷേധം ശക്തമാകാൻ കാരണം. സംഭവത്തിൽ പൊലീസിന്റെ സമീപനത്തിനെതിരെ വ്യാപകമായ വിമർശനമാണ് ഉയരുന്നത്.