"അബട്ടാബാദ് ഓപ്പറേഷന്റെ മറുപുറങ്ങൾ – ലാദന്റെ കുടുംബത്തെ നേരിട്ട് സിഐഎ ചോദ്യം ചെയ്തു"

ഇസ്ലാമാബാദ് ∙ 2011-ൽ അബോട്ടാബാദിൽ ഉസാമ ബിൻ ലാദനെ അമേരിക്കൻ കമാൻഡോകൾ വധിച്ചതിന് പിന്നാലെ, അദ്ദേഹത്തിന്റെ ഭാര്യമാരെ സിഐഎ നേരിട്ട് ചോദ്യം ചെയ്തുവെന്ന വെളിപ്പെടുത്തലുമായി പാകിസ്താനിൽ വിവാദം. പാക് പ്രസിഡന്റ് ആസിഫ് അലി സർദാരിയുടെ മുൻ വക്താവായ ഫർഹത്തുള്ള ബാബർ എഴുതിയ “ദി സർദാരി പ്രസിഡൻസി: നൗ ഇറ്റ് മസ്റ്റ് ബി ടോൾഡ്” എന്ന പുതിയ പുസ്തകത്തിലാണ് ഈ ആരോപണം ഉയർന്നത്.

ബാബറിന്റെ വെളിപ്പെടുത്തലുകൾ പ്രകാരം, ലാദൻ കൊല്ലപ്പെട്ടതിന് തൊട്ടുപിന്നാലെ പാകിസ്താൻ അധികാരികൾ ഭാര്യമാരെ കസ്റ്റഡിയിലെടുത്തു. പിന്നീട്, അമേരിക്കൻ സിഐഎ ഏജന്റുമാർ നേരിട്ടെത്തി ചോദ്യം ചെയ്യുകയും, രാജ്യത്തിന്റെ നേതൃത്വവും സൈന്യവും സമ്മർദ്ദത്തിന് വഴങ്ങുകയും ചെയ്തു. ഇതോടെ “അമേരിക്കൻ ഏജന്റുമാർക്ക് പാകിസ്താൻ മണ്ണിൽ അസാധാരണ സ്വാതന്ത്ര്യം ലഭിച്ചു” എന്ന് പുസ്തകത്തിൽ പറയുന്നു.

ഈ സംഭവത്തെ “ദേശീയ അപമാനം” എന്ന് വിശേഷിപ്പിച്ച ബാബർ, അത് പാകിസ്താന്റെ “പരാജയത്തിന്റെയും നാണക്കേടിന്റെയും നിമിഷമായിരുന്നു” എന്നും കുറ്റപ്പെടുത്തി.

ബിൻ ലാദൻ വധത്തിന് ശേഷമുണ്ടായ അമേരിക്കൻ നേതാക്കളുടെ സന്ദർശനങ്ങളെയും പുസ്തകം പരാമർശിക്കുന്നു. ഹിലരി ക്ലിന്റൺ, ജോൺ കെറി എന്നിവർ പാകിസ്താനിൽ എത്തിയെങ്കിലും, ഭാവിയിൽ അമേരിക്ക ഏകപക്ഷീയമായ ആക്രമണങ്ങളിൽ നിന്ന് വിട്ടുനിൽക്കും എന്നുറപ്പു പാകിസ്താന് ലഭിച്ചില്ലെന്ന് ബാബർ പറയുന്നു.

അബോട്ടാബാദിലെ ഒളിത്താവളത്തെക്കുറിച്ച് അമേരിക്കൻ രഹസ്യാന്വേഷണ ഏജൻസികൾക്ക് ഏറെക്കാലം മുൻപുതന്നെ വിശദമായ വിവരം ഉണ്ടായിരുന്നു എന്നും, ആ കെട്ടിടം നിർമിച്ച കരാറുകാരന്റെ വിവരങ്ങൾ പോലും സിഐഎക്കറിയാമായിരുന്നുവെന്നും പുസ്തകം വ്യക്തമാക്കുന്നു.

അൽഖായിദയോടും ബിൻ ലാദനോടും പാകിസ്താന്റെ ബന്ധം ഇരട്ടമുഖമായിരുന്നുവെന്നും, അഫ്ഗാനിസ്താനിൽ അമേരിക്കയെ സഹായിച്ചിട്ടും സ്വന്തം മണ്ണിൽ അമേരിക്കൻ സൈനിക നീക്കങ്ങൾ നിയന്ത്രിക്കാനായില്ലെന്നും ബാബർ വിലയിരുത്തുന്നു.