മില്ലേനിയൽ വിശുദ്ധൻ” – കാർലോ അക്യൂട്ടിസ് വിശുദ്ധരുടെ നിരയിൽ

വത്തിക്കാൻസിറ്റി: 70,000ത്തോളം യുവജനങ്ങളെ സാക്ഷിയാക്കി വെറും 15 വർഷം മാത്രം ഭൂമിയിൽ ജീവിച്ച കാർലോ അക്യൂട്ടിസ് വിശുദ്ധരുടെ നിരയിലേക്ക് ഉയർത്തപ്പെട്ടു. കംപ്യൂട്ടറിനെയും സാമൂഹ്യമാധ്യമങ്ങളെയും ആത്മീയതയുമായി ബന്ധിപ്പിച്ച് സഭാപ്രബോധനങ്ങൾക്ക് പുതുചൈതന്യം നൽകിയ കാർലോയെ പോപ്പ് ലിയോ വിശുദ്ധപദവിയിൽ പ്രഖ്യാപിച്ചു.

കത്തോലിക്കസഭയുടെ ചരിത്രത്തിൽ വിശുദ്ധപദവി നേടുന്ന ആദ്യ കമ്പ്യൂട്ടർ പ്രതിഭയും, ഈ നൂറ്റാണ്ടിലെ ഏറ്റവും പ്രായം കുറഞ്ഞ വിശുദ്ധനുമാണ് കാർലോ. യുവജനങ്ങൾക്കിടയിൽ “മില്ലേനിയൽ വിശുദ്ധൻ” എന്ന പേരിലാണ് അദ്ദേഹം ഏറെ പ്രശസ്തൻ. പ്രഖ്യാപനച്ചടങ്ങിൽ ലോകത്തിന്റെ വിവിധ ഭാഗങ്ങളിൽ നിന്നെത്തിയ പതിനായിരക്കണക്കിന് യുവജനങ്ങൾ പങ്കെടുത്തു.

“എല്ലാവർക്കും വിശുദ്ധരാകാൻ വിളിയുണ്ട്. ജീവിതം പാഴാക്കാതെ സ്വർഗ്ഗത്തിലേക്ക് നയിക്കണം” എന്ന് പോപ്പ് ലിയോ പ്രസംഗത്തിൽ ഓർമ്മിപ്പിച്ചു. സിനിമകളും ഫുട്‌ബോളും വീഡിയോ ഗെയിമുകളും ഇഷ്ടപ്പെട്ടിരുന്ന കാർലോയെ സൈബർ ലോകത്തെ അപ്പസ്‌തോലൻ, ദൈവത്തിന്റെ ഇൻഫ്ലുവൻസർ എന്നിങ്ങനെയാണ് വിശേഷിപ്പിക്കപ്പെടുന്നത്.

പതിനൊന്നാം വയസിൽ കാർലോ സഭ അംഗീകരിച്ച അത്ഭുതങ്ങളെ രേഖപ്പെടുത്തിയ വെബ്സൈറ്റ് ആരംഭിച്ചിരുന്നു. 2006-ൽ രക്താർബുദത്തെ തുടർന്ന് 15-ാം വയസ്സിൽ മരണപ്പെട്ടെങ്കിലും, കാർലോയുടെ ജീവിതം പുതുതലമുറയ്ക്ക് വിശ്വാസപ്രചരണത്തിന്റെ മാതൃകയായി മാറി.

2020-ൽ വാഴ്ത്തപ്പെട്ടവനായി അംഗീകരിക്കപ്പെട്ട കാർലോയുടെ മധ്യസ്ഥതയിൽ നിരവധി അത്ഭുതങ്ങൾ സംഭവിച്ചതായി സഭ സ്ഥിരീകരിച്ചിട്ടുണ്ട്. ഇതോടെയാണ് അദ്ദേഹത്തെ വിശുദ്ധനായി പ്രഖ്യാപിച്ചത്. ഇറ്റലിയിലെ അസീസിയിലെ ശവകുടീരം ഇന്നും ആയിരങ്ങളായ ഭക്തജനങ്ങളുടെ തീർത്ഥാടനകേന്ദ്രമാണ്.