സംവിധായകൻ സനൽകുമാർ ശശിധരൻ അറസ്റ്റിൽ

കൊച്ചി: സ്ത്രീത്വത്തെ അപമാനിച്ചുവെന്നനടിയുടെ പരാതിയെ തുടർന്ന് സംവിധായകൻ സനൽകുമാർ ശശിധരനെ പോലീസ് കസ്റ്റഡിയിലെടുത്തു. കൊച്ചിയിലെത്തിച്ച ഇയാളെ ചോദ്യം ചെയ്തശേഷം അറസ്റ്റ് രേഖപ്പെടുത്തി.

എളമക്കര പോലീസ് സ്റ്റേഷനിലാണ് കേസെടുത്തിരിക്കുന്നത്. ഈ വർഷം ജനുവരിയിൽ പ്രശസ്ത മലയാളി നടിയോട് സോഷ്യൽ മീഡിയയിലൂടെ ശല്യം ചെയ്തെന്നാരോപിച്ചാണ് കേസ്. കേസ് രജിസ്റ്റർ ചെയ്ത സമയത്ത് സനൽ അമേരിക്കയിലായിരുന്നു. തുടർന്ന്, അദ്ദേഹം ഇന്ത്യയിൽ എത്തുമ്പോൾ കസ്റ്റഡിയിലെടുക്കുന്നതിനായി പോലീസ് ലുക്ക്ഔട്ട് സർക്കുലർ പുറപ്പെടുവിച്ചിരുന്നു.

“പ്രേമിച്ചു എന്നൊരു കുറ്റം മാത്രമേ താൻ ചെയ്തിട്ടുള്ളൂ. പരാതി കെട്ടിച്ചമച്ചതാണ്. ഒരു കുറ്റവും ചെയ്തിട്ടില്ല,” എന്ന് കൊച്ചിയിൽ മാധ്യമങ്ങളോട് സംസാരിക്കവേ സനൽ കുമാർ ശശിധരൻ വ്യക്തമാക്കി.